Елімізде жүргізушісіз көліктер сынақтан өткізіледі

Қазақстанда басқаруы шартты және жоғары деңгейде автоматтандырылған көліктерді енгізу бойынша пилоттық жобаның ережелері бекітілді, деп хабарлайды Orda.kz Өнеркәсіп және инфрақұрылымдық даму министрлігінің баспасөз қызметіне сілтеме жасап.

Алдағы үш жыл ішінде мұндай көліктер Астана, Алматы және Қосшы қалаларында сынақтан өтеді. Тестілеу арнайы полигондарда да, сондай-ақ жалпы пайдаланымдағы жолдардың жекелеген учаскелерінде де жүргізіледі. Бірлескен бұйрыққа Жасанды интеллект және цифрлық даму министрлігі, Көлік министрлігі және Ішкі істер министрлігі қол қойған.

Шартты автоматтандырылған көліктерде салонда кез келген сәтте басқаруды өз қолына ала алатын адам болуы тиіс. Ал жоғары деңгейде автоматтандырылған көліктер жүргізушісіз қозғала алады, бірақ оларды қашықтан оператор бақылап отырады.

Барлық жүргізушісіз көліктер деректерді жазу және бейнебақылау жүйелерімен, автопилотты шұғыл өшіру құралдарымен, бағдарламалық жасақтамаға сырттан араласудан қорғаныс жүйесімен және «Автономды басқару» деген арнайы белгімен жабдықталуы қажет.

Ережелер сондай-ақ мұндай көліктерді такси қызметінде және тұрақты емес жолаушылар тасымалында пайдалану тәртібін, жол-көлік оқиғалары кезінде әрекет ету алгоритмін және сақтандыру талаптарын реттейді.

«Пилоттық жобаны іске асыру автономды көлік технологияларын нақты жағдайда сынақтан өткізуге, қолданыстағы реттеу тетіктерінің тиімділігін бағалауға және осы саладағы заңнаманы одан әрі дамытуға негіз қалыптастыруға мүмкіндік береді», — деді ҚР Жасанды интеллект және цифрлық даму вице-министрі Ғиззат Байтурсынов. 

Бұған дейін Қазақстанда жолаушылар тасымалдай алатын ұшқышсыз ұшу аппараттарына арналған нормативтік база әзірленіп жатқаны хабарланған болатын.

Оқи отырыңыз:

• «ҚазАвтоЖол» жүргізушілер мен жолаушыларды дәретхана маңында тазалық сақтауға шақырды
• Ғалымдар кондиционерсіз бөлмені салқындататын материал жасады