Немересін құтқарам деп 17 млн теңгені алаяқтарға беріп жіберген

Ақмола облысында зейнеткер әйел алаяқтарға немересін құтқару үшін 17 миллион теңге беріп жіберген, деп  Orda.kz хабарлайды.

Зейнеткерге белгісіз біреулер қоңырау шалып, немересінің жол апатына тап болғанын және оның кінәлі екенін айтқан. Қорыққан әжеге алаяқтар жазадан құтқаруға уәде беріп, ақша сұрапты. Немересін қорғау мақсатында зейнеткер еш ойланбастан барын беруге келіседі. Осылайша, ұзақ жылдар бойы бүкіл отбасының, зейнеткердің және оның ересек балаларының жинаған 17 миллион теңгесін алаяқтарға тапсырады. 

Әйелден ақшаны курьер алып кетеді. Алайда бұл алаяқтық ұзаққа бармады – Көкшетау полицейлері дропперді тез арада қолға түсіреді. Тергеу барысында оның бұған дейін де осындай қылмысқа қатысқаны, тағы бір зейнеткерден 1 миллион теңге алғаны анықталды.

Қазіргі уақытта полиция осы қылмысқа қатысы бар басқа да күдіктілерді анықтау бойынша тергеу жұмыстарын жалғастыруда.