Кураторлары шетелде: 105 келіден асатын есірткіні көлік дөңгелегіне жасырған ҰҚТ ұсталды

Көліктегі полиция қызметкерлері ұйымдасқан қылмыстық топтың қызметін тоқтатты. Көліктегі полиция департаменті қызметкерлері ұстаған ұйымдасқан қылмыстық топ мүшелері 16 жылға бас бостандығынан айырылды, деп хабарлайды Orda.kz.       

Есірткі қылмыстарымен айналысқан бұл топтың заңсыз әрекеті өткен жылдың мамыр айында әшкереленген.

Жедел іс-шаралар барысында көліктегі полиция қызметкерлері бірнеше азаматтың Астана, Қарағанды және Шымкент қалаларында есірткі қылмысын ұйымдастыруды жоспарлағанын анықтаған.

Полиция қызметкерлерінің жедел әрекеттері нәтижесінде олардың қылмыстық ниеттері дер кезінде тоқтатылды.

Тергеу аясында алты адам, оның ішінде шетел азаматтары да ұсталды.

Тергеу барысында топ мүшелері арасында міндеттер нақты бөлінгені белгілі болды. Кейбірі курьер, енді бірі үйлестіруші қызметін атқарған. Ірі көлемдегі есірткі заттарын сақтау үшін арнайы жасырын орынға айналдырылған гараж пайдаланылған. Сотқа дейінгі тергеу кезінде жиналған материалдар ұйымдасқан қылмыстық топтың әрекетін толық дәлелдеді.

Тінту кезінде автокөлік дөңгелектерінің ішіне жасырылған, кейін сату үшін дайындалған ірі көлемдегі есірткі заттары тәркіленген.

Заңсыз айналымнан жалпы салмағы 105 келіден асатын есірткі тәркіленген, бұл аса ірі көлемге жатады.

Аталған дерек бойынша көліктегі полиция сотқа дейінгі тергеу жүргізді. Қазіргі уақытта тергеу деректеріне сәйкес шетелде жүрген кураторды анықтау шаралары қабылдануда.

Астана қаласының қылмыстық істер жөніндегі ауданаралық сотының үкімімен ұйымдасқан қылмыстық топтың барлық мүшесі кінәлі деп танылды.

Үкім заңды күшіне әлі енген жоқ.

Оқи отырыңыз:

• Қазақстанда халықаралық есірткі арнасының күдікті ұйымдастырушысы тұтқындалды
• Таразда синтетикалық есірткі тасып жүрген шетелдік курьер қолға түсті
• Алматыда тұрғын үй жертөлесінен жасырын есірткі плантациясы табылды