Министрлік: Декреттегі аналардың курьер болып нәпақа табуы әлеуметтік төлемдерден айыруға себеп емес

Қазақстанда декреттік демалыс кезінде курьер болып қосымша табыс табатын аналарды әлеуметтік төлемдерден айыру жоспарланбаған. Бұл туралы Еңбек және халықты әлеуметтік қорғау министрлігі мәлімдеді, деп хабарлайды Orda.kz. 

Ведомство төлемдердің тоқтатылатыны туралы ақпарат шындыққа сәйкес келмейтінін мәлімдеді.

Министрліктің мәліметінше, әлеуметтік желілерде бала күтімі кезінде қосымша жұмыс істейтін аналарға әлеуметтік төлемдерді тоқтату мүмкіндігі жаппай талқыланып жатыр. Алайда ведомство мұндай жоспар жоқ екенін атап өтті.

Ведомство өкілдері жұмыс істемейтін ата-аналарға төленетін бір жарым жасқа дейінгі бала күтімі бойынша жәрдемақы адамның қосымша табыс табуына қарамастан төлене беретінін еске салды. Төлемдер бала белгіленген жасқа толғанға дейін сақталады.

Ал бала туғанға дейін ресми түрде жұмыс істеп, міндетті әлеуметтік сақтандыру жүйесіне қатысқан ата-аналар үшін бір жарым жасқа дейінгі бала күтіміне байланысты табысынан айырылу жағдайына әлеуметтік төлемдер қарастырылған. Оның мөлшері бала туғанға дейінгі соңғы екі жылдағы орташа табыстың 40 пайызы.

«Сонымен қатар, Қазақстан Республикасының Әлеуметтік кодексіне сәйкес, мұндай төлемдерді тоқтату тек алушының өз еркімен тиісті өтініш беруі арқылы ғана жүзеге асады», деп түсіндірді ведомство. 

Еске салайық, бұл тақырып әлеуметтік желілерде қолында кішкентай баласы бар курьер-ананың фотосы таралғаннан кейін кең талқыланды. Кейін Еңбек министрлігі аталған отбасымен байланыс орнатқанын және оларға мемлекеттік қолдау шараларын ұсынғанын хабарлады. Сондай-ақ ведомство бұл отбасы мұқтаждар санатына жатпайтынын мәлімдеді.

Бұған дейін Еңбек және халықты әлеуметтік қорғау вице-министрі Виктория Шегай мыңнан астам әйелдің декреттік төлемдерді заңсыз алу фактілері бойынша істерге тартылғанын айтқан болатын. Қазақстанның 13 өңірінде 38-ден астам қылмыстық іс қозғалған. Алдын ала келтірілген шығын шамамен 3 млрд теңге.

Оқи отырыңыз:

• Қазнет іздеген курьер-ана табылды
• «Бұл – отбасылық мәселе»: Министрлік сәбиін қолына ұстап курьер болып жүрген анаға қатысты пікір білдіруден бас тартты
• «Алаяқтардан алданып, қарызға батқан»: Курьер-ананың жағдайы айтылды