ЖИ мамандары алғаш рет «Болашақ» бағдарламасы бойынша тағылымдамадан өтеді

Қазақстанда алғаш рет «Болашақ» бағдарламасы аясында жасанды интеллект бағыты бойынша халықаралық тағылымдамалар тағайындалды, деп хабарлайды Orda.kz Ақорда баспасөз қызметіне сілтеп.

Байқау қорытындысы бойынша 184 қазақстандық стипендия иегері атанды. Орташа есеппен бір орынға шамамен алты адамнан келген.

Олардың ішінде 137 адам магистратурада білім алады, 10 адам докторантураға түседі, ал тағы 37 адам шетелдік жоғары оқу орындары мен ғылыми-зерттеу орталықтарында кәсіби тағылымдамадан өтеді.

Бұдан бөлек, 51 қатысушы әлемнің жетекші ғылыми орталықтарында ғылыми тағылымдамадан өту үшін грантқа ие болды.

Сондай-ақ бағдарламаға қатысу мүмкіндіктері шығармашылық жастар үшін де кеңейтілді. Енді «Болашақ» бағдарламасы бойынша оқуға тек халықаралық олимпиадалар мен ғылыми байқаулардың жеңімпаздары ғана емес, сонымен қатар халықаралық шығармашылық конкурстардың жүлдегерлері де үміткер бола алады.

Еске салсақ, былтыр Бурабай баурайында өткен Ұлттық құрылтайда президент 78 жастағы қазақстандықтың «Болашақ» бағдарламасы бойынша шетелде оқуға кеткенін сынаған болатын.

«78 жастағы адам «Болашақ» бағдарламасы бойынша оқуға кетті. 78 жаста қандай «Болашақ» болуы мүмкін? Бұл бағдарлама түсініксіз бағытқа бұрылып барады. Бастапқыда бұл жақсы бастама еді – ғалымдарды оқыту, шетелде тағылымдамалар ұйымдастыру. Ал қазір не болып кетті?» деп ренжіген болатын Тоқаев. 

Оқи отырыңыз:

• Тоқаев жастар форумында: «Қолда бардың қадірін білу керек»
• «Болашақ» кімдердің бағын ашты?
• Депутат Базарбек эмоциясын тежей алмай, «Болашақ» жүйесін қатаң сынға алды