Ақтөбе облысының тұрғыны сарайынан бірнеше артиллериялық снаряд тауып алды

Ақтөбе облысының тұрғыны өз үйінің аумағында тазалық жұмыстарын жүргізу кезінде алты артиллериялық снаряд тауып алды, деп хабарлайды Orda.kz.       

Ақтөбе облыстық полиция департаментінің мәліметінше, Шалқар ауданында жергілікті тұрғын қараусыз қалған сарайды тазалау барысында қауіпті қаруларға тап болған. Ол бұл олжа туралы бірден ішкі істер органдарына хабарлаған.

«Полиция қызметкерлері оқ-дәрілерді тәркілеп, қауіпсіздікті қамтамасыз ету үшін қажетті шараларды қабылдады. Материалдарды қарау нәтижесінде қауіпті заттарды ерікті түрде тапсырғаны үшін азаматқа 181 950 теңге көлемінде ақшалай сыйақы төленеді», деп хабарлады Ақтөбе облысының ПД. 

Заңсыз сақталған қаруды, оқ-дәрілерді, жарылғыш заттар мен жарылғыш құрылғыларды ерікті түрде тапсырған азаматтар қылмыстық және әкімшілік жауапкершіліктен босатылады.

Полицейлер қазақстандықтарды қару-жарақ, оқ-дәрі, снаряд немесе басқа да қауіпті заттарды тапқан жағдайда дереу «102» нөміріне хабарлауға шақырады. Табылған затқа қол тигізуге, оны жылжытуға немесе өз бетінше тексеруге болмайды, себебі бұл айналадағы адамдардың өмірі мен денсаулығына қауіп төндіруі мүмкін.

Еске салсақ, Ақтөбе қаласында Бөгенбай батыр көшесіндегі автогаз құю станциясының аумағында 19 маусымға қараған түні автокөлік өртеніп, екі жасөспірім мен бір ересек адам тірідей жанып кетті.

Оқи отырыңыз:

• «Нағыз апокалипсис»: Ақтөбе әр жаңбырдан кейін су астында қалады
• Ақтөбе облысында бірінші сынып оқушысы мектепте бензин ішіп қойған
• Ақтөбеде автогаз құю бекетінде көлік өртеніп, екі жасөспірім мен бір ересек адам тірідей жанып кетті