Назарбаевтың отбасын жауапкершілікке тарту міндеті тұрған жоқ - Бас прокуратура

Қазақстанның Бас прокуратурасының алдында Нұрсұлтан Назарбаевтың отбасына қатысты қылмыстық іс қозғау міндеті жоқ. Бұл туралы Бас прокурордың орынбасары Әсет Шындалиев мәлімдеді.

Мәжіліс алаңында журналистер одан «Бас прокуратура Назарбаевтың туыстарын шетелге заңсыз қаржы әкеткені үшін тексере ме?» деп сұрады.

- Бізде бірінші президенттің отбасына немесе басқа біреуге қатысты қандай да бір іс қозғау міндеті жоқ. Біз елден заңсыз шығарылған барлық капиталды тексеріп, қайтарумен айналысамыз. Қазір Әділет министрлігі заңнаманы қайта қарау және үйлестіру жұмыстарын жүргізуде. Тиісті түзетулер Қылмыстық кодекске әлі енгізілген жоқ. Әділет министрлігі сараптама жүргізіп, бірінші президент пен оның отбасына қандай баптар қатысты, қайсысы қатысы жоқ екенін анықтайды, - деді Шындалиев.

Ол «Антикор» агенттігінің, Қаржы мониторингі агенттігінің, Ішкі істер министрлігі мен ҰҚК қызметкерлері қылмыстық іс қозғау үшін негіз іздеуі керектігін баса айтты.

Шындалиев сондай-ақ Қазақстан Республикасының Бас прокуратурасы Владислав Челахтың оның ісін қайта қарау туралы өтінішін әлі де қарап жатқанын айтты. Одан жауап алынған жоқ.