Назарбаевтың отбасы мүшелеріне тиесілі жерлер қайтарыла ма? - ресми жауап

Назарбаевтың жақындарына тиесілі жерлер заң бұзушылық анықталған жағдайда мемлекетке қайтарыла ма? Бұл сұраққа ауыл шаруашылығы министрі Ербол Қарашөкеев жауап берді.

Жақында парламент «Тұңғыш президент – Елбасы туралы» заңның күшін жою туралы Конституциялық заңды қабылдады. Оған сәйкес, Назарбаевтың отбасы мүшелері барлық кепілдіктен айырылады.

Журналистер Қарашөкеевтен «заң күшіне енгеннен кейін Назарбаевтың отбасы мүшелеріне тиесілі жерлер егер заң бұзушылық анықталса, мемлекетке қайтарыла ма?» деп сұрады.

- Қандай фамилия болмасын, кім болмасын, бізге ол әсер етпейді. Біз барлық жерді тексереміз. Жерді тиімсіз пайдалану фактілері, жерді заң бұзушылықпен беру фактілері анықталса, әрине, міндетті түрде ол жерді тексеріп, елге қайтарамыз, - деді Қарашөкеев.

Еске салсақ, ауыл шаруашылығы министрлігі былтыр 5 млн гектар жерді мемлекетке қайтарды.