Экс-президентке қатысты қылмыстық іс тоқтатылды

Қырғызстанның бұрынғы президенті Асқар Ақаевтың үстінен Құмтөр кенішін игеруге байланысты қозғалған қылмыстық іс тоқтатылды.

Қырғызстан бас прокуратурасының баспасөз қызметінің айтуынша, іс мерзімі өтуіне байланысты тоқтатылды.

Асқар Ақаев 1991-2005 жылдары Қырғызстан президенті болған. 2005 жылы 24 наурызда «қызғалдақ революциясы» кезінде Мәскеуге қашып кеткен. Кейін отставкаға кетті.

2021 жылы Асқар Ақаев «Құмтөр ісі» бойынша тергеу органдарына жауап беру үшін Қырғызстанға екі рет ұшып келді.

Содан кейін экс-президентке 1992 жылы «Камеко» компаниясымен келісім жасап, 2003 жылғы «Құмтөрді» қайта құрылымдау мәселесі бойынша жаңа айып тағылғанын мәлімдеген.

«Ақаев айтылған қылмыстарды жасағанын толық мойындап, тергеу органдарымен ынтымақтастық орнатты. Оның елден кіріп-шығуы алдын ала тергеушімен келісіледі» деп мәлімдеді Қырғызстан Ұлттық қауіпсіздік мемлекеттік комитеті өкілдері.