"Досаев, жүрегімді жараладың". Алматылық феминистер тағы да пикет өткізді

Алматыда әйелдер құқығы үшін күресіп жүрген белсенділер Жанар Секербаева мен Кәмила Еңсеген 8 наурызда шеру өткізуден бас тартқан қала билігінің назарын аудару мақсатында бір кісілік пикет өткізді.

Жанар Секербаева қолына "арманындағы маршқа" және Ерболат Досаевқа деген "махаббатын" білдіретін "валентинканы" ұстап келген. Ол әкімнің өз жүрегін жаралағанын ирониямен айтты.

"8 наурызда шеру, митинг болуы керек. Шеруді өткізуге небәрі үш сағат уақыт сұраймыз. Біздің үндемей, үйде отырайын деген ниетіміз жоқ", - дейді белсенді.

Ал Кәмила Еңсеген тұрмыстық зорлық-зомбылық мәселесін көтерді. Ол бұрынғы министр Салтанат Нүкенованы өлтірді деген күдікті Қуандық Бишімбаевты мысалға келтірді.

"Бұл әйелдердің қоғамда құқығы қорғалмағынын білдіріп тұр. Өз басым өзімді қауіпсіз сезінбеймін. Жылына кем дегенде бір рет бейбіт митингіге жиналып, проблемаларды айтуға, оларды көтеруге құқығымыз бар. Бізге әкімдік көмектессе деймін", - дейді ол. 

Айта кетейік, феминистер бірнеше рет митинг өткізуге рұқсат сұраған, алайда қала әкімдігі бұған тыйым салған. Халықаралық әйелдер күні шеру өткізу - феминистік қауымдастық үшін дәстүрге айналған шара. Былтыр сексуалдық зорлық-зомбылықпен күресуге арналған митинг Ганди саябағында өтті.

Алматыда әйелдердің ең ірі шеруі осыдан үш жыл бұрын өтті. Оған мыңға жуық адам қатысты.