Астанада ер адам 4 жастағы жиенін терезеден лақтырып, енесін пышақтап, өзі 7-ші қабаттан секіріп кетті

Көршілерінің айтуынша, отбасылық жанжал ер адамның құмар ойынға әуестігі мен миллиондаған доллар қарызынан шыққан.

Ер адамның әйелі зомагердің қолынан құтылып, қашып үлгерген, деп хабарлайды Astana TV.

Қайғылы оқиға «Хабар» тұрғын үй кешенінде болды. Балконның астындағы баланың денесін бірінші болып 1-қабаттағы көршісі көрген. Таяқ жеп, үсті қанға боялған әйелі көмек сұраған. Астана тұрғыны әлеуметтік желіде бастан кешкен сұмдық туралы айтып берді.

«Таңғы сағат бестер шамасында есігімізді біреу қақты. Ашсам алдымда үсті қан-қан, денесі көгала қойдай болған жас қыз тұр. Ол: «Күйеуім жынданып кетті, ол ойыншы, мені ұрды. Қолына түскеннің бәрімен - темірмен ұрды. Пышақ ала жүгіргенінде одан қашып құтылдым...» деді. Мен бірден киініп,жоғарыға көтерілдім … Менің балконымның астында кішкентай бала жатты, басы жарылып, миынан қан кеткен» деп жазды ер адам.

Оқиғаға куә болғандар шошып кетті. Көршілерінің айтуынша, қайғылы жағдайға әкелген жанжалға ер адамның құмар ойынға әуестігі себеп болуы мүмкін.

Полиция төтенше жағдай туралы түсініктеме берді. Қақтығысқа не себеп болғанын тәртіп сақшылары айтпады.

«Ағымдағы жылдың 5 ақпанында 102 арнасына жанжал болып жатыр деген қоңырау келіп түсті. Аталған факті бойынша Қылмыстық кодекстің 99-бабы «Адам өлтіру» бойынша сотқа дейінгі тергеу басталды. Қажетті тергеу амалдары жүргізілуде, сараптамалар тағайындалды» деп хабарлады Астана полиция департаменті.