Үкімет парламентке мемлекеттік активтерді басқару жөніндегі ұлттық есеп ұсынатын болады

22 қазан 2023 16:09 Ләззат Сұңқар

2024 жылдан бастап үкімет Парламентке мемлекеттік активтерді және квазимемлекеттік секторды басқару жөніндегі Ұлттық баяндама ұсынады. Бұл туралы премьер-министр Әлихан Смайылов депутаттардың сауалына берген жауабында мәлім етті, деп хабарлайды Orda.kz.

Жаңашылдық 2024 жылы күшіне енеді.

«Ұлттық есепте мемлекет активтерінің жай-күйі, квазимемлекеттік сектор субъектілерінің қаржылық-шаруашылық қызметі, оның ішінде олардың таза кірісін бөлу және дивидендтер төлеу туралы талдамалық ақпарат қамтылатын болады. Сондай-ақ Ұлттық баяндамада мемлекеттік активтерді және квазимемлекеттік секторды басқару тетіктерін одан әрі дамыту бойынша қорытындылар мен ұсыныстар қамтылады. Осылайша, парламент депутаттары жыл сайын квазимемлекеттік сектордың барлық субъектілері тұрғысында кең ауқымды өзекті ақпаратпен қамтамасыз етілетін болады» делінген жауапта.

Бүгінгі таңда квазимемлекеттік сектор субъектілерін корпоративтік басқару жүйесі акционерлік қоғамдар туралы, шектеулі және қосымша жауапкершілігі бар серіктестіктер туралы, мемлекеттік мүлік туралы заңнамамен реттелетіні түсіндіріледі. Көрсетілген нормативтік құқықтық актілер акционерлердің, директорлар кеңесінің және атқарушы органның өкілеттіктерін шектеу, олардың қызметін ұйымдастыру, барлық акционерлердің, соның ішінде миноритарлық акционерлердің құқықтарын қорғау, директорлар кеңесі қызметін тәуелсіз бағалау, корпоративтік басқару тәртібін т.б. белгілейді.

Жауапта мемлекеттің экономикадағы рөлін шектеу мақсатында квазимемлекеттік сектор субъектілерін бәсекелестік ортаға беру жалғасуда деп көрсетілген. Қазіргі уақытта жекешелендірудің 2021-2025 жылдарға арналған кешенді жоспарына мемлекеттік меншік пен квазимемлекеттік сектордың 658 объектісі кіреді, оның ішінде 5 республикалық меншік, 239 коммуналдық меншік, 262 ұлттық холдингтер, компаниялар және 152 ӘКК.

Оның ішінде, Әлихан Смайылов мәлім еткендей, құны 307,3 млрд теңге болатын 372 нысан бәсекелес ортаға берілді, 64-і сатудың экономикалық мақсатқа сай келмеуі немесе аукционда сұраныстың болмауына байланысты қайта ұйымдастыруға/таратуға жіберілді. Бүгінгі таңда кешенді жоспар 66 пайызға орындалды.

Ол кешенді жоспар аясында «Самұрық-Қазына» қорының ірі компаниялары – Қазақстан темір жолы, QazaqGaz, «Самұрық-Энерго», «Эйр Астана», «KEGOC» АҚ акцияларын IPO/SPO-ға шығару жоспарланып отырғанын еске салды. 2022 жылдың соңында «ҚазМұнайГаз» акцияларының IPO-сы өтті.

«Қазіргі уақытта қор «KEGOC» АҚ (ӘҚҰ) акцияларын қайталама орналастыру бойынша дайындық шараларын жүргізуде. «Эйр Астана» АҚ, «QazaqGaz» ҰК» АҚ, «Қазақстан темір жолы» ҰК» АҚ, «Самұрық-Энерго» АҚ акцияларын IPO арқылы орналастыру 2024-2025 жылдарға жоспарланған», - деді Премьер-Министр.

Жекешелендіру тізбесін одан әрі кеңейту үшін активтерді іріктеу критерийлері бекітілді. Жобаларды уақтылы орындамағаны үшін лауазымды тұлғаларға (мемлекеттік органдар басшысының орынбасарларынан, ұйымдар басшысының орынбасарларынан төмен емес) тәртіптік жауапкершілік көзделген.

Жалпы, осы бағытта қабылданған шаралар мемлекеттің экономикадағы үлесін 2020 жылғы 15 пайыздан 2022 жылдың соңында 14,2 пайызға дейін төмендетуге мүмкіндік берді, делінген Премьер-Министрдің жауабында.

Жаңалықтар

барлық жаңалықтар