Қазақстандықтарды Таяу Шығыс елдерінен эвакуациялауға 4 млн доллар жұмсалды

Таяу Шығыстағы жағдайдың ушығуы кезінде қазақстандықтарды эвакуациялауға бюджеттен 4 млн доллар жұмсалды, деп хабарлайды Orda.kz.       

«Үкімет пен әуе компаниялары өте жақсы жұмыс атқарды. Алғашқы кезеңде шамамен 4 мың жолаушы эвакуацияланды. Кейін біздің азаматтардың саны 10 мыңнан асты. Жалпы бұл шараға мемлекет орта есеппен шамамен 4 млн доллар жұмсады», — деді ҚР көлік министрі Нұрлан Сауранбаев үкімет брифингінде. 

Журналистер «Әуе компанияларының шығындары толық өтелді ме, әлде үкімет жай ғана қаржы бөліп, компаниялар соны пайдаланды ма?» деп нақтылады.

«Біз әуе компаниялары шығындарының бір бөлігін өтедік. Өздеріңіз білесіздер, ондағы жолаушылардың бір бөлігі билеттерін осы компаниялардан алдын ала сатып алған. Яғни, қызмет құнының бір бөлігі бұрыннан төленген. Соған сәйкес қосымша төлемдер болды, атап айтсақ  сақтандыру тәуекелдері, сондай-ақ азаматтарды Дубайдан жағдайы тұрақты көрші елдерге жеткізу қажет болды. Осы жұмыстардың барлығына шамамен 4 млн доллар жұмсалды», — деп толықтырды министр. 

Министрдің айтуынша, бұл қаражат әуе компанияларының шығындарын өтеуге, сақтандыру тәуекелдерін жабуға және адамдарды қауіпсіз транзиттік аймақтарға жеткізуге (атап айтқанда, Дубайдан көрші елдерге тасымалдауға) бағытталған.

Көлік министрінің сөзінше, бастапқыда шамамен 5 мың адамды эвакуациялау жоспарланған, алайда кейін өтініш білдірушілер саны артқандықтан, қосымша ресурстар жұмылдыруға тура келген. 

Оқи отырыңыз:

• Таяу Шығыстан 10 мыңнан астам қазақстандық елге оралды
• Эвакуация басталғалы Таяу Шығыстан 8585 қазақстандық елге қайтарылды
• ҚР СІМ Таяу Шығыс елдеріне сапарламау туралы ескерту жасады