«Ақтөбе» ФК матчына барған әйелдің бетіне доп тиіп, миы шайқалды

19 мамыр 2026 11:05 Перизат Жарылқасын

Фото: ЖИ арқылы жасалды

Ақтөбеде өткен футбол матчында жанкүйер әйел жарақат алып қалды. Жасыл алаңдағы доп ұшып келіп келіншектің бетіне тиіп миы шайқалған, деп хабарлайды Orda.kz.

Оқиға «Ақтөбе» мен «Алтай» командалары арасындағы ойын кезінде болған. Матч қызған сәтте трибунада отырған Аянай Елтоқованың бетіне алаңнан ұшып шыққан доп тиген. Сол сәтте келіншектің жанында жұбайы болған екен, алғашқы көмек көрсетіліп, кейін жұбайы жедел жәрдем шақырған. Енді олар клубтан моральдық және материалдық шығынды өтеуді талап етпек.

«Доп келіп тигенде бірден бетімнен қанап, өзім сол сәтте не болғанын түсінбей қалдым. Басымды төмен түсірдім, содан кейін не болғанын білмеймін. Стадион жанындағы орындықта отырған кезде ғана есімді жинай бастадым. Ауруханаға барған соң дәрігерлер тексеріп, ауруханаға жату қажет екенін айтты. Қорытындысында маған жабық бас-ми жарақаты, жұмсақ тіндердің жаралануы және ауыр дәрежедегі ми шайқалуы диагнозы қойылды», — дейді Аянай Елтоқова.

Сонымен қатар, келіншектің айтуынша, жарақаттан кейін оны ұйқысыздық пен бас ауруы мазалай бастаған. Ол бұл жағдайды стадиондағы қауіпсіздік талаптарының жеткіліксіздігімен байланыстырады. Аянай Елтоқова клуб өкілдерінің оқиғадан кейін бірден хабарласып, жағдайын сұрамағанына наразы екенін айтты.

Ал «Ақтөбе» ФК өкілдері бұл жағдайға байланысты ресми кешірім сұрағанын мәлімдеді.

«Клуб тарихында мұндай жағдай алғаш рет болып отыр. Біз ресми түрде кешірім сұрадық. Ертең кездесіп, өзіне және жұбайына бір жылдық абонемент пен клуб жейделерін береміз. Әдетте стадионда тор орнатылмайды, халықаралық талаптарға сәйкес торлар тек қақпа артына қойылады», — деді клубтың медиа-офицері Әсет Жомарт.

Ал бетіне доп тиіп ұйқыздық мазалап жүрген келіншек стадиондағы қауіпсіздік шараларын күшейтуді талап етіп отыр. Сондай-ақ, ол футбол клубынан моральдық және материалдық шығын үшін өтемақы өндіруге ниетті.

Оқи отырыңыз:

Жаңалықтар

барлық жаңалықтар