Ауыр жүк көліктеріне елді мекендердің ішінде жүруге тыйым салынады

19 мамыр 2026 14:24 Ләззат Сұңқар

Фото: kolesa.kz

Жақында ауыр жүк көліктеріне елді мекендердің ішінде жүруге тыйым салатын заңды шара енгізу мүкіндігі қарастырылады. Көлік министрлігі мұндай көліктер «триллиондаған қаржыға» салынған жолдарды тез бұзатынын, тіпті ғимараттарға да әсер етуі мүмкін екенін мәлімдеді, деп хабарлайды Orda.kz.

Ауыр жүк көліктерінің елді мекендерге кіруін шектеу – Қазақстандағы көлік саясатының маңызды бағыттарының біріне айналып отыр. Бұл бастама жол қауіпсіздігін арттырумен қатар, қалалардағы экологиялық жағдайды жақсартуға және жол инфрақұрылымының тозуын азайтуға бағытталған.

Көлік министрі Нұрлан Сауранбаев ұсынған жаңа шаралар осы мәселелерді жүйелі түрде шешуді көздейді. Оның айтуынша, ең алдымен ауыр жүк көліктерінің елді мекендердің ішіне кіруіне шектеу қойылады. Бұл – әсіресе ірі қалалар үшін өзекті мәселе. Себебі үлкен тоннажды көліктер жолдарды тез бұзады, кептелісті күшейтеді және тұрғындарға қауіп төндіреді.

Жаңа жүйенің негізгі ерекшелігі – бақылаудың толық автоматтандырылуы. Арнайы салмақты автоматты өлшеу жүйелері (weight-in-motion) көліктерді тоқтатпай-ақ олардың салмағын анықтай алады. Егер жүк көлігі рұқсат етілген нормадан, яғни бір оське 8 тоннадан артық жүкпен қозғалса, жүйе оны бірден тіркейді.

Сонымен қатар, «Сергек» камералары арқылы көліктің мемлекеттік нөмірі тексеріліп, оның техникалық және салмақтық бақылаудан өткен-өтпегені анықталады. Бұл тәсіл адам факторын азайтып, сыбайлас жемқорлық тәуекелдерін төмендетуге мүмкіндік береді.

Ережені бұзған жағдайда қатаң шаралар қарастырылған. Егер ауыр жүк көлігі белгіленген нормадан асып, қала аумағына кірсе, оған айыппұл салынып қана қоймай, көлік айып тұрағына қойылады. Бұл талаптар жүргізушілерді тәртіп сақтауға мәжбүр етеді.

Қазіргі таңда бұл жүйе Астана қаласының айналасында пилоттық режимде енгізіліп жатыр. Мамандардың айтуынша, егер жоба тиімділігін дәлелдесе, ол Алматы, Шымкент және басқа да ірі қалаларда кезең-кезеңімен іске қосылады.

Сарапшылардың пікірінше, мұндай тәжірибе әлемнің көптеген елдерінде бұрыннан бар. Мысалы, Еуропа қалаларында ауыр жүк көліктері көбіне айналма жолдармен ғана жүруге міндетті. Қазақстан да осы бағытта заманауи цифрлық бақылау жүйелерін енгізу арқылы көлік логистикасын өркениетті деңгейге көтеруді көздеп отыр.

Жалпы алғанда, бұл бастама тек жолдарды сақтау немесе айыппұл салу үшін ғана емес, қалалардағы өмір сапасын жақсартуға арналған кешенді шешім деуге болады.

Оқи отырыңыз:

Жаңалықтар

барлық жаңалықтар