Үкімет Алатау қаласы үстінен ұшып жүрген ұшқышсыз аппарат жайын түсіндірді

Алатау қаласы аспанында байқалған ұшқышсыз аппарат аэротаксидің сынақ ұшуы болып шықты. Бұл туралы Үкімет брифингінде көлік министрі Нұрлан Сауранбаев мәлімдеді, деп хабарлайды Orda.kz.

Оның айтуынша, 17 мамыр күні аэротаксидің алғашқы сынақ ұшуы өткен.

«Кеше ұшқышсыз аэротаксидің тестілік ұшуы өтті. Бұған дейін біз мамыр айында қытайлық AutoFlight компаниясының аппаратына алғашқы сынақ жүргізетінімізді айтқан едік» ,—
деді министр. 

Өз кезегінде көлік вице-министрі Талғат Ластаев аппараттың техникалық сипаттамалары туралы да айтып берді.

«Бұл — қытайлық AutoFlight компаниясының аппараты. Ол 250 шақырымға дейін ұшып, сағатына 200 шақырым жылдамдыққа дейін жете алады. Қазіргі уақытта мамандар Алатау қаласында аппараттың сынақ ұшуларын жүргізіп жатыр», — деп түсіндірді Ластаев. 

Сауранбаев сондай-ақ аэротакси төрт жолаушыға арналғанын қосты. Қазір «Аллюр» және «Алатау Advanced Group» компаниялары сынаққа арналған ұшқышсыз аппараттарды сатып алуда, ал мемлекет бір мезгілде қону алаңдары мен операциялық орталық салумен айналысып жатыр.

Мұндай ірі жобалар кезең-кезеңімен дайындықты, технологияларды сынауды және барлық қауіпсіздік жүйелерін тексеруді талап етеді. Сондықтан қазір Алатауда пилоттық кезең жүріп жатыр. Оның аясында мамандар жаңа буындағы жолаушылар әуе аппараттарының мүмкіндіктерін, жүк жеткізуге арналған ұшқышсыз жүйелерді және қалалық ортадағы әуе қозғалысын цифрлық басқару технологияларын сынақтан өткізуде.

Жобаға Оңтүстік Корея, Италия және Қытайдан халықаралық серіктестер қатысып жатыр. 

Тақырыпқа сай ұсынамыз:

• Ресейдің ұшқышсыз ұшатын аппараты Румынияның әуе кеңістігін бұзды
• Зеленский: Украина Таяу Шығыс елдерімен бірге ұшқышсыз ұшатын аппарат шығарады
• «Калашников» дрондарға қарсы жаңа құрал шығарды