Алматы облысындағы саяжайда ірі көлемде есірткі дайындағандар сотталды

Алматы облысында ер адам сыбайластарымен бірге есірткі дайындаған. Оның жұбайы бұл туралы білгенімен, полицияға хабарламаған. Әйел сотталғанымен, кассациялық сатыда оған қатысты іс өндірісі тоқтатылды, деп хабарлайды Orda.kz.       

«Кассациялық соттың» хабарлауынша, 2023 жылдың мамырынан 2024 жылдың қаңтарына дейін ер адам басқа тұлғалармен бірге мессенджер арқылы нұсқау алып, ал жабдықты жасырын орындардан алу арқылы психотроптық заттарды заңсыз өндіруді ұйымдастырған.

Алматы облысындағы саяжай учаскесінде ол затты ірі көлемде дайындап, сатуға әзірлеген.

2024 жылғы 8 қаңтарда күдікті ұсталып, тінту барысында есірткі, оның компоненттері мен жабдықтар тәркіленген. Бұл аса ірі көлемде өндіріс болғаны расталды.

Ер адамның жұбайы оның заңсыз әрекеті туралы білген, алайда бұл жөнінде құқық қорғау органдарына хабарламаған. Сот оны қылмыс туралы хабарламағаны үшін (ҚР ҚК 434-бабы) кінәлі деп таныды, алайда қылмыстық жауаптылықтан босату оңалтуға құқық бермейтін негіздер бойынша жүзеге асырылған.

Кассациялық сот ер адамға қатысты ҚР ҚК 297-бабы 3-бөлігі бойынша 10 жылға бас бостандығынан айыру туралы үкімді өзгеріссіз қалдырды, себебі айыптаудың негізіне алынған дәлелдер сенімді әрі жеткілікті деп танылған.

Ал жұбайына қатысты сот актілері кассациялық сатыда күшін жойды. Кассациялық сот ҚР ҚК 434-бабының нормаларын адамның өзіне, жұбайына және жақын туыстарына қарсы куәлік бермеу жөніндегі конституциялық құқығын ескермей қолдануға болмайтынын атап өтті.

Осыған байланысты әйелді қылмыстық жауапкершілікке тарту, тіпті кейіннен босатылғанның өзінде, Конституция мен құқықтың негізгі қағидаттарына қайшы деп танылды. Оған қатысты іс өндірісі оңалту негіздері бойынша тоқтатылды.

Оқи отырыңыз:

• ДСМ қазақстандықтарға хантавирус қаупіне қатысты ескерту жасады
• Иран байытылған уранын АҚШ-қа емес, Ресейге бермекші
• Негізгі тестілеуден бір апта өтпей жатып 86 талапкердің ҰБТ нәтижесі жойылды