«Су тасқыны салдары»: 5 мыңнан астам отбасы жаңа тұрғын үй алды

Су тасқынынан зардап шеккен 5 239 отбасы жаңа тұрғын үймен қамтамасыз етілді.

Бұл туралы үкімет хабарлады.

Зардап шеккен аймақтарда жаңа үйлердің құрылысы қарқынды түрде жүргізіліп жатыр. 2 568 нысанның 470-і толық аяқталып, тұрғындарға кілттері табыс етілді.

Солтүстік Қазақстан облысында 285 үй, Қостанай облысында 57, Батыс Қазақстан облысында 80, Ақтөбе облысында 43 және Павлодар облысында 5 үй пайдалануға берілді. Су басқан үйлерді тексеру және бағалау жұмыстары 100% аяқталды. 8 853 отбасы жөндеу және қалпына келтіруге арналған 49,3 миллиард теңге көлемінде төлем алды.

Қосымша 34 216 отбасы 100 АЕК көлемінде бір реттік өтемақы алып, бұл үшін 12,6 миллиард теңге бөлінді. Жоғалған қажетті заттарды сатып алу үшін 150 АЕК дейін қосымша төлемдер жүзеге асырылып жатыр. Бұл көмек 21 869 отбасыға 9,9 миллиард теңге көлемінде көрсетілді.

Сондай-ақ, зардап шеккен кәсіпкерлердің шығындарын өтеу жұмыстары жалғасып жатыр. Өңірлік комиссиялар 7,9 миллиард теңге сомасында 455 ШОБ субъектісінің өтініштерін қарап, мақұлдады. Жоғалған мал үшін мемлекет тарапынан көмек көлемі 2,8 миллиард теңгеден асты.