Бишімбаев ісімен танылған Айжан Аймағанова прокуратурадан кетті

Айжан Аймағанова прокуратура органдарындағы қызметінен кеткенін Instagram желісіндегі парақшасында мәлімдеді, деп хабарлайды Orda.kz.       

Айжан Аймағанова мәлімдемесін сторис арқылы жариялады. Оның есімі партиялардың бірінен депутаттыққа кандидаттар тізімінде жарияланғаны белгілі.

«Соңғы күндері әлеуметтік желілерде менің партия атынан депутаттыққа кандидат ретінде ұсынылуыма қатысты ақпарат белсенді талқылануда. Осы жағдайға жеке өзім түсініктеме беруді маңызды деп санаймын. Көп жылдар бойы мен прокуратура органдарында қызмет еттім. Бұл мен үшін әрдайым заң мен мемлекетке қызмет ету және азаматтардың құқықтарын қорғау болды. Кандидат ретінде ұсынылуыма байланысты мен прокуратурадан жұмыстан шықтым. Бұл – заң талабы, мен оны орындадым» деп жазды ол. 

Сонымен қатар, ол бұл шешімді саналы түрде қабылдағанын айтып, қолдау білдіргендерге алғыс білдірді.

«Менің кәсіби тәжірибем мен білімім заң шығару қызметінде, сондай-ақ азаматтарды алаңдататын мәселелерді шешуде пайдалы болады деп сенемін. Қолдау көрсеткендеріңізге, сұрақтарыңыз бен назарларыңызға рахмет. Бұл мен үшін маңызды. Алда атқарылатын жұмыс көп, мен ашық диалогқа дайынмын», – деп түйіндеді ол. 

Еске салсақ, былтыр  Айжан Аймағанованың фейк парақшасына 20 мың жазылушы жиналған болатын. Бұл туралы Астана прокуратурасына аккаунт кеңінен тарай бастаған кезде белгілі болды. Содан кейін ол өз парақшасын жүргізуді қолға алған болатын.

Оқи отырыңыз:

• Айжан Аймағанова Шерзаттың өліміне қатысты пікір білдірді
• Бишімбаев ісі бойынша прокурор Қазақстан халқына үндеу тастады
• Астана прокуратурасы Айжан Аймағановаға қатысты мәлімдеме жасады