Президент Райымбек ауданы тұрғындарын 90 жылдық мерейтойымен құттықтады

12 шілде 2026 08:09 Ләззат Нұрсапақызы

Фото: Алматы облысы әкімдігі

Шалкөде жайлауында өтіп жатқан «Хан-Тәңірі қазынасы» халықаралық этнофестивалінің салтанатты ашылуында мемлекет басшысының құттықтау хатын Қазақстан Республикасы президентінің кеңесшісі Мәлік Отарбаев оқып берді, деп хабарлайды Orda.kz.

Қасым-Жомарт Тоқаев өз құттықтауында бұл қасиетті өлкенің мемлекет мүддесіне адал қызмет еткен көптеген көрнекті тұлғаларды дүниеге әкелгенін атап өтті. Сондай-ақ президент аудан тұрғындарының ауыл шаруашылығы, туризм және экономиканың өзге де салаларын дамытуға қомақты үлес қосып отырғанын ерекше атап өтті.

Райымбек ауданы — тарихы терең, бірлік дәстүрі берік, құтты мекен. Бұл жер ұлт мүддесіне жан-тәнімен қызмет еткен талай дара тұлғаны тәрбиелеп шығарды. Бердібек Соқпақбаев, Мұқағали Мақатаев сынды белгілі қаламгерлердің еңбектері халықтың рухани мұрасына айналып, жас ұрпақты отансүйгіштікке, білімге құштарлыққа және еңбекқорлыққа тәрбиелеп келеді.

«Бүгінде аудан тұрғындары ауыл шаруашылығы, туризм және басқа да салаларда адал еңбек етіп, туған өлкенің өркендеуіне лайықты үлес қосуда. Олар ел болашағы үшін маңызды бастамаларды әрдайым қолдап, ауызбіршілік пен азаматтық жауапкершіліктің жарқын үлгісін көрсетіп келеді. Бұған олардың жалпыұлттық референдумға белсенді қатысуы және жаңа Конституцияны қолдауы айқын дәлел» деп жазылған Қазақстан президентінің құттықтау хатында.

Мемлекет басшысы өңірдің дамуына үлес қосып жүрген барша азаматтарға алғыс білдіріп, Райымбек ауданының тұрғындарына амандық, бақ-береке, толағай табыс пен ел игілігі жолындағы еңбектеріне жаңа жетістіктер тіледі.

Айта кетейік, Райымбек ауданының 90 жылдығына арналған мерекелік іс-шаралар үш күнге созылды. Мерейтой аясында ғылыми-танымдық конференциялар, республикалық айтыс және концерттік бағдарламалар өтті. Салтанатты шаралардың шарықтау шегі Шалкөде жайлауында өтіп жатқан «Хан-Тәңірі қазынасы» халықаралық этнофестивалі.

Оқи отырыңыз:

Жаңалықтар

барлық жаңалықтар