Гонконг әуе компаниясы Қазақстанға рейс ашады

Cathay Pacific әуе компаниясы 2026 жылдың тамыз айынан бастап Астанаға жүк рейстерін, ал 2027 жылдың қаңтарынан бастап Гонконг–Алматы бағыты бойынша жолаушылар рейсін ашуды жоспарлап отыр, деп хабарлайды Orda.kz.        

Бұл туралы Қазақстанның Көлік министрлігі хабарлады.

«Қазақстан Республикасы Көлік министрлігі халықаралық әуе қатынастары географиясын кеңейту және жаңа шетелдік әуе тасымалдаушыларды тарту бойынша тұрақты жұмыс жүргізуде. Осы мақсатта Азаматтық авиация комитетінің төрайымы Салтанат Томпиева «Cathay» (Гонконг) әуе компаниясының Таяу Шығыс өңірі бойынша аймақтық менеджері Оливер Коэльомен кездесті»  деп жазылған хабарламада. 

Кездесу барысында Оливер Коэльо 2026 жылғы 1 тамыздан бастап аптасына 5 рейске дейінгі жиілікпен «Боинг-747» әуе кемелері арқылы Астана қаласына тұрақты жүк рейстерін ашу жоспары бар екенін мәлімдеді.

Сонымен қатар, компания өкілі 2027 жылдың қаңтарынан бастап аптасына 3 рет «Эйрбас-330» ұшақтарымен Гонконг–Алматы бағыты бойынша тұрақты жолаушылар рейстерін іске қосуды көздеп отырғанын хабарлады.

Салтанат Томпиева қазақстандық тараптың аталған жобаларды жүзеге асыруға қажетті қолдау көрсетуге дайын екенін растады.

Кездесу қорытындысы бойынша екі жақ жүк және жолаушылар рейстерін іске қосу үшін қажетті рәсімдерді бірлесіп жалғастыруға, сондай-ақ Қазақстан мен Гонконг арасындағы әуе қатынасын дамыту мәселелері бойынша тығыз өзара іс-қимылды сақтауға келісті.

Көлік министрлігінің мәліметінше, жаңа рейстің ашылуы сауда-экономикалық және туристік байланыстарды одан әрі дамытуға, логистикалық мүмкіндіктерді кеңейтуге, сондай-ақ Қазақстан мен Гонконг арасындағы ынтымақтастықты нығайтуға ықпал етеді.

 «Cathay» — Гонконгтың ұлттық әуе компаниясы және Азиядағы ірі халықаралық әуе тасымалдаушылардың бірі. Компания еншілес бөлімшелерін қоса алғанда шамамен 237 әуе кемесін пайдаланады және 100-ден астам бағыт бойынша жолаушылар тасымалын жүзеге асырады», деп атап өтті министрлік. 

«Cathay Cargo» 41 бағыт бойынша тұрақты жүк тасымалын орындайды және жыл сайын 1,67 миллион тоннадан астам жүк тасымалдап, әлемдегі жетекші әуе жүк тасымалдау операторларының қатарына кіреді.

Оқи отырыңыз:

• Бишімбаев ісімен танылған Айжан Аймағанова прокуратурадан кетті
• 200 жер телімі алынады: Үлкен Алматы айналма жолына алты жолақты магистраль қосылады
• 15 жастағы қазақстандық ауыр атлет әлем чемпионатында әлемдік рекорд орнатты