BaiQymyz-2026: Астанадағы фестивальде қонақтарға 56 тонна қымыз құйылады

BaiQymyz-2026 гастрономиялық фестивалі қымыз дәмін тату, концерттер, ұлттық ойындар, көрмелер және басқа да этномәдени іс-шараларын ұсынады, деп хабарлайды Orda.kz.       

BaiQymyz-2026 — еліміздің оқиғалық туризм саласындағы маңызды жобалардың бірі. Фестиваль 11–12 шілде күндері Астанада өтеді.

«Қазанат» ипподромында ұйымдастырылатын гастрономиялық шара ұлттық мәдениет пен дәстүрлі қазақ тағамдарын насихаттауға бағытталған. Қонақтарға 56 тонна қымыз ұсынылатыны елорда әкімдігінің ресми сайтында хабарланды.

Екі күнге созылатын ауқымды шара барысында келушілер ұлттық тағамдардан дәм татып қана қоймай, қазақ халқының дәстүрлері, қолөнері мен өнерімен жақынырақ таныса алады. Фестивальдің басты ерекшелігі — қонақтарға 56 тонна қымыз ұсынылатыны болып отыр.

Бағдарламада суретшілер мен қолөнершілер көрмелері, сондай-ақ ұлттық ат спорты түрлері бойынша көрсетілімдер бар. Балалар мен ересектерге арналған түрлі танымдық және ойын-сауық іс-шаралары жоспарланған.

Фестивальдің әр күні отандық эстрада жұлдыздарының қатысуымен гала-концертпен аяқталады.

BaiQymyz-2026 фестиваліне ыңғайлы жету үшін ұйымдастырушылар қоғамдық көлікті пайдалануды және мүмкіндігінше жеке автокөліктен бас тартуды ұсынды.

Елорда тұрғындары мен қонақтарына қолайлы болу үшін 7–13 шілде аралығында №18, №37 және №303 автобус бағыттарының қозғалыс сызбалары уақытша өзгертіліп, автобустар фестиваль өтетін «Қазанат» ипподромына қарай бұрылады. 

Ал 11–12 шілде күндері, яғни фестиваль өтетін уақытта, аталған бағыттар ұзартылған режимде — сағат 23:00-ге дейін жұмыс істейді.

Еске салсақ, былтыр Қазақстан тарихында алғаш рет «BaiQymyz – бапталған қымыз» атты гастрономиялық фестиваль өтті.

Онда ұлттық сусын — қымызға арналған, алғашқы күннің өзінде 40 мыңнан астам қонақ жиналды. Олардың қатарында Астана тұрғындары мен еліміздің әр өңірінен келген қонақтар ғана емес, жақын және алыс шетелден келген туристер де келді.

Оқи отырыңыз:

• 40 мың адам мен 30 тоннадан астам қымыз: Астанада BaiQymyz фестивалі өтіп жатыр
• Алматы облысында түйе керуені Гиннесс рекордын жаңартты
• «Әділет» партиясы сайлауалды бағдарламасы мен кандидаттар тізімін бекітті