ӘЧ-2026: FIFA финал өткен алаңды бөлшектеп, сатылымға шығарды

Халықаралық футбол федерациясы (FIFA) 2026 жылғы әлем чемпионатының финалы өтетін АҚШ-тағы Нью-Джерси штатындағы Ист-Ратерфорд қаласында орналасқан New York New Jersey (MetLife) стадионының алаң шөбінің бөліктерін сатылымға шығармақ, деп хабарлайды  Orda.kz DW-ге сілтеме жасап.

FIFA дүкені сайтында көрсетілгендей, алаңға төселген жасыл шөптің бөліктері 11 шілде, сенбі күні таңертеңнен бастап сатылымға шықты. Бастапқы жиынтықтағы бір бөлігі 450 доллар (390 еуро) тұрады.

Сипаттамада әрбір «сувенирлік» шөп бөлігі 17,5×17,5×17,5 өлшемінде екені көрсетілген, алайда бұл өлшемнің нақты қай бірлікте (дюйм, сантиметр немесе миллиметр) берілгені нақтыланбаған.

Сатып алушыларға «футбол тарихының шынайы бір бөлшегінің иесі болуға» шақыру таратылды. Алаң бөлігі 2026 жылғы әлем чемпионатының логотипі бейнеленген акрил қаптамаға салынған және оған түпнұсқалығын растайтын сертификаты бар USB-жинақтауыш қоса беріледі.

FIFA сайтында тапсырыстарды жеткізу әлем чемпионаты финалынан кейін ғана басталатыны айтылған. Қазіргі уақытта жеткізу тек АҚШ, Ұлыбритания және құрлықтық Еуропа аумағындағы мекенжайларға ғана қолжетімді.

2026 жылғы футболдан әлем чемпионаты 11 маусым мен 19 шілде аралығында Солтүстік Америкада өтуде. Турнир ойындарының басым бөлігі АҚШ-та (16 қабылдаушы қаланың 11-інде) ұйымдастырылса, тағы үш қала Мексикада, екі қала Канадада матчтар қабылдады.

Ширек финалдан бастап барлық плей-офф кезеңінің матчтары АҚШ стадиондарында өтуде.

10 шілдеге қараған түні алғашқы жартылай финал жолдамасын Франция құрамасы жеңіп алды. Бір тәуліктен кейін өткен екінші ширек финалда оның қарсыласы Испания құрамасы анықталды. Бұл жартылай финал 14 шілдеде Техас штатындағы Даллас маңындағы Арлингтон қаласында Орталық Еуропа уақытымен 21:00-де өтеді.

Жартылай финалға сондай-ақ Англия мен Аргентина құрамалары да шықты. Екінші жартылай финал 15 шілдеде Атлантада өтеді. Финалдық матч 19 шілдеде АҚШ-тағы MetLife стадионында жергілікті уақыт бойынша 15:00-де (Орталық Еуропа уақытымен 21:00-де) басталады.

Есе салсақ, Қазақстан 2026–2027 жылдары бірден жеті әлем чемпионатын өткізу құқығына ие болғанын жаздық. 2026 жылы Қазақстанда күрес түрлерінен әлем чемпионаты өтеді. Ал 2027 жылы елімізде алты бірдей әлем чемпионаты өтеді.       

Олардың қатарында олимпиадалық спорт түрлері – үстел теннисі, дзюдо, бокс, таэквондо, сондай-ақ киберспорт пен жасөспірімдер арасындағы шорт-трек бар.

Оқи отырыңыз:

• ӘЧ-2026: Испания құрамасы Бельгияны жеңіп өз рекордын жаңартты
• ӘЧ-2026: Биылғы чемпионаттағы он қызықты дерек
• Қазақстан 2026–2027 жылдары бірден жеті әлем чемпионатын өткізу құқығына ие болды