Ираннан келген итбалықтар Ақтауда қырылып жатыр ма?

Каспий теңізі жағалауында өлі итбалықтар әлі де көптеп табылып жатыр. Алайда ҚР Ауыл шаруашылығы министрлігінің Балық шаруашылығы комитетінің төрағасы Серік Сермағамбетов олардың Қазақстан аумағында өлмегенін мәлімдеді, деп хабарлайды Orda.kz.

Оның айтуынша, итбалықтар тек Қазақстан жағалауында ғана емес, бүкіл Каспий акваториясында қырылуы мүмкін.

Бұл жағдай Әзербайжан мен Иран жағалауларында да болған. Кейін батыстан соққан дауылды желдер олардың өлекселерін Ақтау бағытына қарай алып келеді.

«Бұл тек біздің аумақта ғана емес, бүкіл Каспий акваториясында болып жатыр. Ол Әзербайжан немесе Иран аумағында да болуы мүмкін. Ал батыстан соққан дауылды желдер оларды Ақтау жағына қарай әкеледі. Осы мәселе бойынша біз жергілікті атқарушы органдармен, қоғамдық ұйымдармен бірге өлекселерді жинау және каспий итбалығын сақтау бойынша өзара іс-қимыл алгоритмін қабылдадық», — деді ол ОКҚ-дағы брифингте. 

Ол сондай-ақ Ақтауда мемлекеттік табиғи резерват ашылғанын айтты. 2025 жылы бұл аумақта қыс мезгілінде кеме қатынасына шектеу қойылып, балық аулау учаскелері итбалықтардың көші-қон жолдарынан алыстатылған.

Сермағамбетовтің мәліметінше, биыл 230 өлі итбалық табылған.

«Зерттеулерге сәйкес, бұл асфиксиядан, жер асты сілкіністерінен және газдың бөлінуінен болады. Сондықтан итбалықтар тұншығып өледі», — деді комитет басшысы.

Ол мұндай жағдайлар жыл сайын тіркелетінін атап өтті. Ең ауыр жағдай 2024 жылы болған — сол кезде шамамен екі мыңға жуық итбалықтың өлексесі табылған.

Бұған дейін Каспий жағалауынан 191 өлі итбалық табылғаны хабарланған. Ауыл шаруашылығы вице-министрі Аманғали Бердалин бұл жағдайды табиғи құбылыстармен, соның ішінде жер сілкінісі кезінде газдың бөлінуімен түсіндірген еді. Сол кезде қауіпті аурулар мен судың ластануы анықталмаған.

Оқи отырыңыз:

• Каспий таязданды, итбалықтар қырылды. Себебі неде?
• Батыста балық қырылды: мамандар себебін анықтады