Дархан Сатыбалды: Биыл 11 мыңнан астам мұқтаж азаматтың тұрғын үй жағдайы жақсарады

Әкімдіктің хабарлауынша 2026 жылы Алматыда 11 мыңнан астам тұрғын баспанамен қамтылады, деп хабарлайды Orda.kz.       

Алматы әкімі Дархан Сатыбалды мен «Отбасы банк» басшысы Ләззат Ибрагимова тұрғын үй жағдайын жақсартуға мұқтаж отбасыларға жаңа пәтерлердің кілтін табыстады. Дархан Сатыбалды тұрғын үймен қамтамасыз ету мемлекет үшін басым бағыттардың бірі болып қала беретінін атап өтті.

«Мемлекет басшысының тапсырмасына сәйкес азаматтардың әл-ауқатын арттыру – мемлекеттік саясаттың маңызды бағыттарының бірі. Мемлекеттік қолдауға шын мәнінде мұқтаж азаматтарды баспанамен қамтамасыз етуге ерекше көңіл бөлінеді. Биыл Алматыда 11 мыңнан астам мұқтаж азаматтың тұрғын үй жағдайын жақсарту жоспарланып отыр»,— деді Алматы әкімі. 

Бұл – бағдарламаның алғашқы кезеңі ғана. 885 пәтер берілгеннен кейін қала екінші кезеңде тағы 1832 пәтер, үшінші кезеңде 670, ал төртінші кезеңде 6161 пәтер беруді жоспарлап отыр.

Жыл соңына дейін мыңдаған отбасы тұрғын үй мәселесін шеше алады.

Жалпы 2026 жылы 8250 адам жалдамалы тұрғын үймен қамтамасыз етіледі. Тағы 1298 адам жеңілдетілген несиелік бағдарламалар арқылы пәтер сатып ала алады, ал кемінде 1650 жас маман «Алматы жастары» бағдарламасы аясында баспаналы болмақ.

Сонымен қатар әлеуметтік осал санаттағы азаматтарға ипотеканың бастапқы жарнасының бір бөлігін жабатын тұрғын үй сертификаттары беруді жалғастырады. Жыл ішінде осындай 200 сертификат беру жоспарланған.

Сондай-ақ жалдау ақысының бір бөлігін субсидиялау бағдарламасы да жалғасады. Бұл бағдарлама жалдамалы пәтерде тұратын отбасылардың жалдау шығындарын азайтуға көмектеседі.

Оқи отырыңыз:

• Алматы қаласының жаңа әкімі қандай уәде берді
• «Бұлай болмайды!»: Сатыбалды Алматыдағы құрылыстың тоқтап тұрғанына ашуланды
• Президент қабылдауында болған Алматы әкімі не айтты?