Үш күннен бері Астана қоқыс полигонындағы ірі өртті сөндіру мүмкін болмай отыр

Астанада 2026 жылғы 10 шілдеге қараған түні тұтанған қоқыс полигонындағы өртті сөндіру жұмыстары әлі де жалғасып жатыр, деп хабарлайды Orda.kz.

Елордадағы Байқоңыр ауданында орналасқан қатты тұрмыстық қалдықтар полигонындағы өртті жою жұмыстары 2026 жылғы 12 шілдедегі жағдай бойынша тәулік бойы жүргізілуде, деп мәлімдеді Төтенше жағдайлар министрлігі.

Өртті сөндіру тиімділігін арттыру үшін негізгі күштер мен құралдар қатыстырылған екі учаске құрылған. Сонымен қатар, өрт ошақтарын оқшаулау және оттың одан әрі таралуына жол бермеу мақсатында полигон аумағын инертті материалмен көму бойынша инженерлік жұмыстар қатар жүргізілуде. Қазіргі таңда полигонға шамамен 14,85 мың тонна инертті материал жеткізілген.

ҚР ТЖМ мәліметінше, жұмыстарға қалың түтін, жиналған қалдықтардың желмен ұшып әрі бос жатуы кедергі келтіруде. Бұл арнайы техниканың жүруін шектеп, ірі көлемді көліктердің маневр жасауын едәуір қиындатқан. Үздіксіз су жеткізілуі өрт сөндіру автоцистерналары мен гидранттардан су таситын көліктер арқылы қамтамасыз етіліп отыр екен.

«Жағдай ТЖМ-нің тұрақты бақылауында. Өртті толық сөндіру жұмыстары жалғасуда», деп хабарлады ведомство. 

Өртті сөндіруге ТЖД қызметкерлері мен жергілікті атқарушы органдардан шамамен 120 адам және 150-ге жуық техника қосылған.

Оқи отырыңыз:

• Астана маңында көлік карьерге батып, екі бала қаза тапты
• Петропавлда есірткі тасымалдаушы полициядан қашамын деп дүкенді талқандады
• Гонконг әуе компаниясы Қазақстанға рейс ашады