Шымкентте өрттен аман қалған отбасы үйлі болды

Шымкенттегі Қайнарбұлақ саяжайында жалдамалы үйінен өрт шығып, алты баласымен аман қалған 35 жастағы жалғызбасты ана Нәзира Дүйсебаева жұрт жинап берген ақшаға үй алғанын хабарлады. 

Нәзираның сөзінше, бір аптаның ішінде 21 млн 100 мың теңге жиналған. 19 млн 500 мың теңгеге осы саяжайдан алты бөлмелі үй сатып алған. Қазір құжаттарын рәсімдеп жүр. 

 - Кеше үйді таптық. Үй аялдамаға жақын. Жаңа үй. Бір жерден от жағамыз, барлық үй жылиды. Үйдің ішінде жуынатын, ас ішетін бөлме бар. Қыздарыма, ұлдарыма бөлек-бөлек бөлме болатын болды. Қонақ күтетін бөлме де бар. Қазір үй иелері жиналып, көшіп жатыр. Жақын күндері көшіп барамыз. Барлық жанашыр адамдарға көп-көп рақмет! - деді қуанышымен бөліскен Нәзира. 

Нәзира балаларымен бірге бір аптадан бері көршісінің үйін паналап отыр. Айтуынша, балаларының жайы қалыпты, қорқынышы басылған.

12 қаңтар күні таңертең Дүйсебаева алты баласымен бірге өмір сүріп жатқан жалдамалы үй пешінің мұржасына жақын орналасқан шатырдан өрт шыққан. Үлкен ұлы оянып кетіп, үйден бәрі аман шыққан. 

Нәзираның қиын жағдайға тап болғанын көршісі видеоға түсіріп, әлеуметтік желіге жариялағаннан соң жұрт бұл отбасына жылу жинай бастаған. 

Нәзираның тұңғышы – 13 жасар, кенжесі 2 жаста. 5 жасар қызы — мүгедек. Күйеуі ішімдікке салынып, ажырасқан. Өзі жетім өскен.