Қазақстандықтардың депозиттен түсетін табысы азаяды

Ұлттық банктің базалық мөлшерлемені төмендету саясатын жалғастыратыны туралы шешімінен кейін басқа банктер де салымдар бойынша мөлшерлемелерін азайтып жатыр, деп хабарлайды Orda.kz.

Базалық мөлшерлеме төмендеген соң Қазақстан банктері депозит шарттарын қайта қарай бастады. Салымдардың табыстылығы өзгеретіні туралы алғаш болып Home Credit Bank пен Freedom Bank Kazakhstan хабарлады.

Home Credit Bank 1 тамыздан бастап бірқатар депозиттер мен депозиттік сертификаттар бойынша сыйақы мөлшерлемелерін төмендететінін мәлімдеді.

Атап айтқанда, «Сберегательный Хоум+» депозиті (3 айға), сондай-ақ VIP-клиенттерге арналған осы депозит (6 айға) бойынша номиналдық мөлшерлеме 18,65%-дан 18,24%-ға дейін төмендейді. Жылдық тиімді сыйақы мөлшерлемесі (ЖТСМ) 20,50%-дан 20,00%-ға дейін азаяды.

Сонымен қатар банк «Стандартный 2.0» депозиттік сертификаттарының табыстылығын да төмендетеді. 12 айлық сертификат бойынша мөлшерлеме 19,5%-дан 19,0%-ға, ал 2 жылдық сертификат бойынша 18,75%-дан 18,25%-ға дейін азаяды. Барлық жағдайда төмендеу 0,5 пайыздық тармақты құрайды. Қалған шарттар өзгеріссіз қалады.

Freedom Bank Kazakhstan да депозит шарттарын өзгерткенін хабарлады.

6 тамыздан бастап «Стратегия» депозиті (3 айға) жаңа және ұзартылған салымдар үшін 18,09% номиналдық мөлшерлемемен және 19,50% ЖТСМ-мен ашылады.

7 тамыздан бастап «Капитал» депозиті бойынша да шарттар өзгереді. 1 айлық салымдарға 16,95% номиналдық мөлшерлеме және 18,00% ЖТСМ қолданылады.

Бұған дейін Altyn Bank те нақты мөлшерлемелерді көрсетпей, депозиттер бойынша сыйақы мөлшерлемелерін төмендететінін хабарлаған болатын.

Депозит шарттарының өзгеруі Ұлттық банктің ақша-несие саясатын жұмсартуы аясында орын алды. 24 шілдеде реттеуші базалық мөлшерлемені жылдық 17%-дан 16,75%-ға дейін (±1 пайыздық тармақ дәлізімен) төмендетті. Бұл — маусымдағы шешімнен кейінгі екінші төмендету. Ол кезде мөлшерлеме бірден 1 пайыздық тармаққа қысқарып, 17%-ға түскен еді.

Ұлттық банк бұл шешім инфляцияның баяулауымен түсіндіреді. Маусым айында жылдық инфляция 10,3%-ға дейін төмендеді (бір ай бұрын — 10,4%) және қатарынан тоғыз ай бойы азайып келеді.

Сонымен қатар реттеуші алдағы шешімдер инфляция динамикасына, тұтынушылық сұранысқа және бюджет саясатының орындалуына байланысты болатынын атап өтті.

Базалық мөлшерлеме төмендегеніне қарамастан, экономикадағы ақша-несие шарттары әлі де қатаң күйінде қалып отыр. Қазақстан қаржыгерлер қауымдастығы (ҚҚҚ) сарапшыларының айтуынша, бірінші жартыжылдықта нақты пайыздық мөлшерлеме инфляцияның жылдам төмендеуі нәтижесінде 5,7%-дан 6,7%-ға дейін өскен. Бұл ақша-несие саясатының ішкі сұранысқа тежеуші әсерін күшейткен.

ҚҚҚ деректеріне сәйкес, бұл әсер экономикада байқала бастады. Қаңтар–мамыр айларында бөлшек сауда өсімі өткен жылғы 6,5%-дан 3,6%-ға дейін баяулаған. Ал тұтынушылық несиелер беру көлемі өткен жылдың осы кезеңіндегі 17,8% өсімнен кейін 8%-ға қысқарған.

Сонымен бірге депозит нарығында бірінші жартыжылдықта қорландыру құны айтарлықтай өзгермеген. Мұны мөлшерлемелердің өсу кезеңінен кейінгі тұрақтанумен байланыстыруға болады. Ал банктердің тамыз айынан бастап депозит табыстылығын төмендетуі Ұлттық банктің шілдедегі шешімінің халық үшін алғашқы нақты көрінісі болуы мүмкін.

Оқи отырыңыз:

• Жаңа базалық мөлшерлеме халықты ипотекасыз қалдыру қаупін тудырды
• Квазимемлекеттік компания қызметкерлері бюджет ақшасын депозитке салып, өсім алып отырған
• Отбасы банк жеңілдетілген ипотекаға кедергі болатын тұстарын алып тастады