Рамиль Мухоряповқа қарсы қылмыстық іс тоқтатылды

Полиция кәсіпкер, Choco холдингінің бас директоры және негізін қалаушы Рамиль Мухоряповқа қатысты істі тоқтатты.

Бұл туралы Алматы прокуратурасы хабарлады.

Choco холдингінің тең төрағасы Рамиль Мухоряпов ешқандай жауапкершілікке тартылмайды.

«Сотқа дейінгі тергеп-тексеру қорытындысы бойынша қылмыстық қудалау органы қылмыстық құқық бұзушылық құрамының болмауына байланысты қылмыстық істі тоқтату туралы процессуалдық шешім қабылдады» делінген хабарламада.

Еске салайық, Chocofamily Holding компаниясының негізін қалаушы және тең иесі Рамиль Мухоряпов төңірегіндегі жанжал өткен аптада тұтанған болатын. Кәсіпкердің қазақ тіліне қатысты мәлімдемесі дау туғызды. Мухоряпов орысша сөйлейтін қазақтардың орысша қойылған сұраққа қазақша жауап беруін «ұлтшылдық пен төмен мәдениеттің көрінісі» деп бағалады.