Қазақстандықтардың нақты табысы 13%-ға қысқарды

Қазақстанда 2022 жылғы желтоқсанда жан басына шаққандағы орташа номиналды ақшалай табыс алдын ала мәліметтер бойынша 149 510 теңге болды, деп хабарлайды ҚР Стратегиялық жоспарлау және реформалар агенттігінің Ұлттық статистика бюросының баспасөз қызметі.

Бұл 2021 жылғы желтоқсанмен салыстырғанда 4,7%-ға артық, көрсетілген кезеңдегі нақты ақшалай кіріс 13%-ға азайды.

Тұтыну бағасының индексі ағымдағы жылдың қаңтар айында өткен жылдың желтоқсан айымен салыстырғанда 101,1% құрады. Азық-түлік тауарларының бағасы 1,4%-ға, азық-түлік емес тауарлардың бағасы 0,9%-ға, халыққа арналған ақылы қызметтер 0,7%-ға қымбаттады. Өнеркәсіп өнімдерін өндіруші-кәсіпорындардың бағасы қаңтарда желтоқсанмен салыстырғанда 1,6%-ға төмендеді.

Жұмыссыздар саны, бағалау бойынша, 2023 жылдың қаңтарында 456 мың адамды құрады. Жұмыссыздық деңгейі жұмыс күшінің 4,8% құрады. Жұмыспен қамту органдарында жұмыссыз ретінде тіркелгендер саны қаңтардың аяғында 212,1 мың адам болды немесе бұл жалпы жұмыс күшінің 2,3%-ы.