Қамауда отырған Кәрім Мәсімовтің жағдайы расында мүшкіл ме? - ресми жауап

Өткен аптаның басында ҰҚК-нің экс-төрағасы Кәрім Мәсімовтің «сот процесі кезінде есінен танып құлап, оған шұғыл ота жасалғаны» туралы ақпарат тарады.

«30 қаңтар күні Астанадағы сот процесі кезінде құлап қалды. Ол жедел жәрдем көлігімен ауруханаға жеткізіліп, ота жасалды. Қазақстан заңына сәйкес, Мәсімовтің денсаулық жағдайы тез арада қамаудан босатуға кепілдік беруі керек.

Гуманитарлық босатуға және істі оның пайдасына шешуге халықаралық шақырулар бірнеше мәрте болғанымен, Мәсімов жылдан аса уақыт түрмеде отыр. Бұл оның 30 қаңтарда құлап қалуына және ота жасатуына әкелді. 

Ақпанның 6-сы күні Мәсімов ауыр инфекциядан зардап шеккеніне қарамастан, тәуір медициналық көмегі жоқ тергеу изоляторына қайтарылды» делінген karimmassimov.com сайтында.

NEGE порталы К.Мәсімовтің жағдайына байланысты ҰҚК төрағасы Е.Сағымбаевқа ресми сауал жолдаған. Сауалдарымызға бөлімше бастығы С.Ахметқалиевтан жауап келді.

«Сіз сұрап отырған мәліметтер «ҚР Халық денсаулығын сақтау туралы» заң кодексінің 273-бабы, 1-тармағына сәйкес дербес медициналық деректер, медициналық көмекке жүгіну фактісі, адам денсаулығының жай-күйі, оның ауруының диагнозы туралы ақпарат және оны зерттеп қарау және емдеу кезінде алынған өзге де мәліметтер медицина құпиясын құрайды.

Сонымен қатар, «ҚР Ақпаратқа қол жеткізу туралы» заңының 1-бабы, 8-тармағына сәйкес медицина қызметкерінің құпиясы қол жетімділігі шектеулі ақпаратқа жатады. 

Баяндалған негізде және ҚР «Бұқаралық ақпарат туралы» заңының 18-1-бабы 2-бөлігі, 3-тармағына сәйкес, К.Мәсімовке қатысты ақпаратты беру мүмкін емес» делінген жауапта.