Мектептегі соңғы қоңырау рәсімі 1 маусымға ауыстырылады

Қазақстан мектептеріндегі Соңғы қоңырау рәсімі 1 маусымға ауыстырылады. Бұл туралы Оқу-ағарту министрлігінің орта білім Комитетінің төрағасы Гүлмира Кәрімова мәлімдеді.

– Қазақстандық мектептердегі оқу жылының ұзақтығы 36 аптаны құрайды. Дәстүр бойынша, біз білетіндей, оқу жылы 1 қыркүйектен басталады. Осы жылдан бастап оқу жылы 31 мамырда аяқталады. 31 мамыр – бұл оқу күні, онда сабақтан басқа балалардың жас ерекшеліктерін ескере отырып, сыныптан тыс іс-шаралар өткізіледі, – деді Кәрімова.

Осылайша, 1 маусым күні мектеп оқушылары Халықаралық балаларды қорғау күнімен қатар соңғы қоңырауды атап өтеді.

Еске салайық, бұған дейін Amanat партиясының депутаты Аманжол Әлтай қазақстандық мектептерде соңғы қоңырауды өткізуді 31 мамырдан басқа күнге ауыстыруды ұсынған еді.

31 мамыр – саяси қуғын-сүргін және ашаршылық құрбандарын еске алу күні.