«Қазір қаруымды шығарып, атамын»: Шерзат көз жұмған түн туралы куәгер қыз баяндады

Шерзат Полат ісі бойынша бұған дейін аты аталған екі қыздың бірі – Эльмира Нұрбекова сотта куәлік берді, деп хабарлайды Orda.kz.

Оның сөзінше, оқиғаға дейін екі күн бұрын айыпталушылар Абзал, Нұрқияс және Равиль оның құрбысы Данамен танысқан. Қалған жігіттерді танымайтынын айтып берді.

«Равиль маған жазып, кездесуді ұсынды. Мен оған кешке дейін жұмыста болатынымды айттым. Кейінірек Дана маған «Равиль кездескісі келіп жатыр» деп жазды. Біз мейрамханаға бардық, сол жерде жігіттер отыр екен. Біз Данамен бірге биледік, кейін солармен бір үстелге отырдық. Үстелде Нұрқияс, Равиль, Абзал, Азамат және Тоқтаубаевтар болған. Столда арақ-шарап та тұрды», – деді ол сотта.

Куәгердің айтуынша, мейрамхана жабылғаннан кейін бәрі сыртқа шыққан. Ол үйге қайтқысы келгенімен, жігіттер оларды дүкенге кіріп-шыққан соң, апарып тастайтынын айтқан.

«Мен үйге қайтамыз дегенде, Нұрқияс пен Равиль: «Біз өзіміз апарып тастаймыз, тек бірінші дүкенге барамыз» деді. Дүкен алдына келгенде, жігіттер көліктен секіріп түсіп, дүкенге қарай беттеді. Біз алғашында Данамен көлікте қалдық, кейін темекі алу үшін дүкенге кірдік. Іште біз танымайтын екі ер адам тұрды. Біз: «Темекі сатыла ма?» деп сұрадық. Солардың бірі: «Жоқ, дүкен жабық. Шығыңдар, әйтпесе қазір қаруымды шығарып, ата бастаймын» деді. Осы кезде біреу есікті іштен теуіп жіберді. Сол дүкеннің алдында Нұрқиясты біреу ұрып жіберді», – дейді Эльмира. 

Оның сөзінше, дәл осы сәтте күтпеген әрекет болған. Белгісіз бір адам ауаға оқ атып, жағдай күрт шиеленіскен.

«Сол кезде сақалы мен бас киімі бар ер адам дүкеннің жанынан жүгіріп шығып, екі рет аспанға оқ атты. Мен Равильге: «Қойыңдар, төбелеспеңдер» деп тоқтатуға тырыстым. Бірақ ол тыңдамай, төбелеске қосылып кетті. Біз Данамен шетке шықтық», – деді куәгер.

Соттағы жауап барысында ол оқиға кезінде төбе шашы тік тұрғанын жасырмады.

«Сол сәтте әйел адамның көмек сұраған айқайын естідік. Жерде ес-түссіз жатқан баланы көріп, тұрып қалдым. Атыс даусынан кейін бәрі дүкеннің артына қарай жүгіріп кетті. Шынымды айтсам, жүрегім аузыма тығылып, қозғала алмай тұрып қалдым. Біреу қолымнан тартып, көлікке қарай жетелеп алып кетті. Кім екенін көрмедім», – деді ол.

Кетіп бара жатқанда куәгер бейнежазба жасап тұрған әйелді көріп, жедел жәрдем шақыруын сұраған. Одан кейін қыздар жігіттермен бірге тауға қарай кеткен.

«Бір әйелдің бәрін бейнежазбаға түсіріп тұрғанын көріп, «Жедел жәрдем шақырыңыз» деп айтып үлгердім. Кейін көлікпен тауға қарай жол тарттық. Жолда бір жерге тоқтадық. Жігіттер: «Көлікте күтіңдер» деп шықты. Артынша қара джип келді, біз соған отырып, төмен қарай беттедік. Содан соң полиция тоқтатты», – деді Эльмира Нұрбекова сотта.

Эльмира Нұрбекова бұл оқиғадан кейін ауаға мылтық атқан ер адамды жәбірленушілермен беттестіру кезінде танығанын айтты.

«Кейін жәбірленушілермен беттестіру кезінде ауаға оқ атқан, сақалы бар, басында бас киімі (кепкасы) болған ер адамды бірден таныдым», – деді Эльмира.

Еске сала кетсек, бүгінгі сот отырысында әжесі Жұмабике жұмыстан келгенде топ болып, жабылып жатқан адамдарды көргенін, Шерзатқа ұмтылған анасын екі ер адам ұстап тұрғанын көргенін айтты. Шерзаттың анасы Гүлбара Бишімбиева да тура сол жағдайды баяндады. Сонымен қатар осы істе куәгер болып жазадан құтылған екі қыздың өзіне тас атқанын және бұзақылардың бірінің қолынан мылтық көргенін баяндап берді.

Сонымен қатар басты куәгер әрі жәбірленуші, марқұмның әкесі Қаржаубай Нұрымов та куәлік берді. Ол «Хуторлық» жігіттерден жұрт сескенетінін, бұрындары көршілерін өлтіріп кеткенін баяндады.

Еске сала кетсек, Талғарда 4 қазан күні бір топ адам келіп дүкен иесі Қаржаубай Нұрымов, ұлы Шерзат Полат және ағасы Нұрқанатпен жанжалдасып, арты кісі өліміне ұласты. 16 жасар Шерзат Полат қаза болды. Бұл іс қоғамда үлкен резонанс тудырды.

9 желтоқсан күні таңертең жасөспірім Шерзат Полаттың ағасы Нұрқанат Ғайыпбаевтың денесі табылды.

10 желтоқсанда Азат ауылында Шерзаттың ағасы Нұрқанат Ғайыпбаевтың жаназасы өте салысымен арты үлкен дауға айналды. Қаржаубай Нұрымов 10 желтоқсан күні ағасының жаназасында ұсталды. Ол жүк көлігінің төбесіне шығып, ұлы мен ағасының өліміне қатысты әділ тергеу жүргізуді талап еткен болатын. Сот оны ұсақ бұзақылық пен полиция қызметкерлеріне шабуыл жасады деген айыппен 15 тәулікке қамау туралы шешім шығарды. Алайда Нұрымов бұл айыптарды жоққа шығарып, тек полиция көлігінің дөңгелектерін тескенін мәлімдеді.

Осы кезде полиция туыстары мен адвокаттары өтінген соң, Қаржаубайды ұстадық деп мәлімдеген еді. Қаржаубай Нұрымовтың адвокаты полицияға оның жақындары ұстаңдар деп айтпағанын мәлімдеді.

Нұрқанат Ғайыпбаевтың өліміне қатысты оқиғаның егжей-тегжейін мына репортаждан оқи аласыз.

Еске сала кетсек, ІІМ бірінші орынбасары Бауыржан Әленов пен бас прокурор Берік Адамов және тергеу ісін қолға алған Самат Айысов 15 қазан брифинг өткізген. Олардың артынан ұсталғаны мәлім болды. Ұсталғандардың кім екенін сол брифингте айтып берген еді.

Шерзаттың үйі өртенген түні болған оқиғаны мына сілтемеден оқыңыз.