Қазақстан С-300 зениттік-зымыран кешенін сынақтан өткізді

Қазақстан әскерилері Сарышаған полигонында өткен оқу-жаттығуда С-300ПС зениттік-зымыран кешенін жердегі нысананы жою үшін қолданды. Зымыран берілген нысанаға сәтті тиген, деп хабарлайды Orda.kz.

«Ашық аспан – 2026» бірлескен оқу-жаттығуы «Батыл тойтарыс – 2026» стратегиялық командалық-штабтық оқу-жаттығуы аясында өтті.

Оқу-жаттығу кезінде С-300ПС-тен бөлек, эшелонды әуе шабуылына қарсы қорғаныс жүйесінің құрамында С-75 кешені де қолданылды. Әскери қызметшілер радиолокациялық құралдар мен радиоэлектрондық күрес кешендерін бірыңғай ақпараттық-барлау кеңістігіне біріктіруді пысықтады.

Негізгі міндеттердің бірі – әскери басқару органдары мен бөлімшелердің әуе шабуылы құралдарының жаппай соққысын тойтаруға дайындығын тексеру болды. Сондай-ақ авиация, әуе шабуылына қарсы қорғаныс және радиоэлектрондық күрес бөлімшелерінің өзара іс-қимылы, атыс тапсырмаларынан кейін позицияларды ауыстыру және жедел маневр жасау тәсілдері пысықталды.

Әскерилер әртүрлі типтегі дрондарға қарсы іс-қимылға да ерекше назар аударған. Бұдан бөлек, сыртқы нысана көрсету арқылы атыс құралдарын жасырын орналастыруды көздейтін әуе шабуылына қарсы тұтқиылдан соққы беру тактикасы сынақтан өтті.

Оқу-жаттығу барысында жасанды интеллект элементтері бар автоматтандырылған басқару жүйелері де сыналды. Қорғаныс министрлігінің мәліметінше, алынған тәжірибе әуе қорғанысы күштерін даярлау мен қолдану жүйесін жетілдіруде пайдаланылмақ.

Оқу-жаттығуға Қорғаныс министрінің орынбасары – Әуе қорғанысы күштерінің бас қолбасшысы, генерал-майор Қайрат Садықов жетекшілік етті.

Әуе қорғанысы әскерлерінің қолбасшысы Әділ Сүбебаевтың айтуынша, бөлімшелердің әуедегі жағдай жылдам өзгерген кезде үйлесімді әрекет ету қабілеті тексерілген. Оның сөзінше, оқу-жаттығу барысында қойылған міндеттер толық орындалған.

Оқу-жаттығу қорытындысы бойынша әскери бөлімшелердің түрлі әуе жағдайында тапсырмаларды орындауға дайындығы бағаланды.

Оқи отырыңыз:

АҚШ пен Иран соққы алмасты: Не болды?

Түрмеде отырған Мадуро қатты арықтап кеткен: Трамп Венесуэла мұнайын бөліске салып жатыр