Қазақстанда сұйытылған мұнай газын экспорттауға тыйым салынды

Қазақстанда сұйытылған газды автомобиль және теміржол көлігімен экспорттауға тыйым салынды. Шектеу алты ай бойы күшінде болады.

Бұл турплы Энергетика министрлігінің баспасөз қызметі хабарлады.

Ведомство сұйытылған мұнай газының бөлшек сауда бағасын мемлекеттік реттеу енгізілгеннен кейін тұрғындар мен көптеген өнеркәсіптік кәсіпорындар отынның осы түріне тез ауыса бастағанын еске салды. 2022 жылы оның ішкі нарықтағы тұтынуы 28 пайызға артса, биылғы тоғыз айда өсім шамамен 200 мың тонна болды.

«Егер ішкі нарыққа айына 130-140 мың тонна қажет болса (әкімдіктердің мәліметі бойынша) маусымға байланысты Энергетика министрлігі жеткізу жоспары аясында 120-130 мың тонна немесе сұраныстың 90 пайызын таратады. Өндіріс орындарындағы жоспарлы және жоспардан тыс жөндеу жұмыстары кезінде ішкі нарықтың сұйытылған мұнай газына деген сұранысы 15-25 пайызға өтелмейді»,- деп түсіндірді Энергетика министрлігі.

Ведомствода атап өткендей, сұйытылған газды экспорттауға тыйым салу туралы шешім оның тұтыну көлемінің өсуі мен елдің ішкі нарығындағы әлеуметтік маңыздылығын ескере отырып қабылданған.