Ақтөбеде кісі өлтіріп, денесін қоқыс алаңына тастаған адам 14 жылға сотталды

15 шілде 2026 12:04 Ләззат Нұрсапақызы

Фото: Көрнекілік үшін

Ақтөбе қаласында биыл 21 ақпанда ер адамдар ішімдік ішіп отырған кезде олардың арасында жанжал туындаған. Үй иесі қонақты бірнеше рет пышақтап, ол алған жарақаттарынан оқиға орнында көз жұмған, деп хабарлайды Orda.kz.

Осыдан кейін ер адам мәйітті үлкен сөмкеге салып, 24 ақпанға қараған түні шанамен қоқыс алаңына апарып тастаған. Тек 11 наурыз күні сөмке күдік тудырып, оқиға орнына полиция шақырылып, нәтижесінде ер адамның мәйіті табылған.

Сот 62 жастағы жергілікті тұрғынды 55 жастағы танысын өлтіргені үшін кінәлі деп танып, оны 14 жылға бас бостандығынан айырды.

Сотта ер адам өз әрекетін өзін-өзі қорғау мақсатында жасағанын айтқанымен, оның уәжі қабылданбады. Сонымен қатар ол моральдық зиянды өтеу ретінде 2 миллион теңге төлеуге міндеттелді.

Кейіннен 55 жастағы ер адамның мәйітін №38 мектептің жанындағы қоқыс алаңынан аула сыпырушы тауып алған. Оның айтуынша, сөмке бірнеше күн бойы сол жерде тұрған.

«Сөмкеден өте жағымсыз иіс шықты. Әрине, мәйіт ыдырай бастаған сияқты. Біз әйелім екеуміз осы маңда тұрамыз әрі осында аула сыпырамыз. Сөмкені ашып қарағым келген, бірақ иістен жақындай алмадым. Ішінде бұзылған ет шығар деп ойладым. Кеше мұнда полиция келіп, ешкімді жақындатпады. Сөйтсек, сөмкенің ішінде адамның мәйіті болған екен», — деді аула сыпырушы.

Алдын ала мәлімет бойынша, қаза болған 1971 жылы туған ер адам.

Полиция департаменті бұл дерек бойынша қылмыстық іс қозғалғанын хабарлады. Қазіргі уақытта оқиғаның барлық мән-жайын анықтауға бағытталған тергеу және жедел-іздестіру шаралары жүргізілуде.

Сонымен қатар, қала тұрғындарының чаттарында екі мәйіт табылғаны және Ақтөбеде маньяк жүр деген жалған ақпарат тарауда. Полиция бұл мәліметтердің шындыққа жанаспайтынын мәлімдеді.

Оқи отырыңыз:

Жаңалықтар

барлық жаңалықтар