Бюджетке 730 миллиард теңге салық неге түспеген?

2025 жылдың қорытындысы бойынша Қазақстанның республикалық бюджетіне 730 млрд теңге салық түспей қалған, деп хабарлайды Orda.kz.

Бұл жоспардың 4,8 пайызына тең. Мұндай деректерді мемлекеттік аудит нәтижесі бойынша Жоғары аудиторлық палата келтірді. Негізгі себептердің бірі — шенеуніктердің салық түсімдері болжамын бастапқыда шамамен 1,3 трлн теңгеге артық жоспарлауы.

Аудиторлар сондай-ақ салық және кеден органдарының жұмысында нақты заңбұзушылықтарды анықтады. Мәселен, гибрид автокөліктерді импорттау кезінде тек электр көліктеріне арналған жеңілдіктер қолданылған. Сонымен қатар, сыртқы экономикалық қызметке қатысатын 34 субъект қосылған құн салығын есепке алу әдісін заңсыз пайдаланған. Соның салдарынан бюджетке 740 млн теңгеден астам қаржы түспеген.

Жалпы, Жоғары аудиторлық палата 2,7 млрд теңгеге қаржылық заңбұзушылықтарды, 33 рәсімдік бұзушылықты және 11 жүйелік кемшілікті анықтады. Барлық жауапты органдарға тиісті нұсқамалар жолданды.

Бұған дейін хабарланғандай, биыл қымбат жылжымайтын мүлік иелері төлем түбіртектерінде салықтың артқанын байқамайды. Сән-салтанат салығы Қазақстанда іс жүзінде тек 2027 жылдан бастап енгізіледі.

Еске салсақ, наурызда президент Қасым-Жомарт Тоқаев барлық деңгейдегі мәслихат депутаттары форумында сөйлеген сөзінде  әкімдіктердегі «масылдық» туралы пікір білдірген еді. Оның айтуынша, жергілікті билік өкілдері табысты арттыру бағытында белсенді жұмыс істеуі керек.

Оқи отырыңыз:

• «Пайдасын олигархтар көреді, халық табысы өспейді»: Сарапшы елдегі жағдайды талдады
• Тоқаев: Бюджет қаражатына ғана иек артып отыратын «масылдықтан» арылу қажет