Астанада жасөспірім лифт ішінде 5 жасар баланың бетіне пышақпен жарақат салды

Астанада психоневрологиялық диспансерде есепте тұрған жасөспірім лифтте баланың бетіне пышақ жарақатын салды, деп хабарлайды Orda.kz. 

Шабуыл жасаған жасөспірім 14 жаста болса, зардап шеккен бүлдіршін небары 5 жаста.

«Оқиғаны тергеу барысында психоневрологиялық диспансерде есепте тұрған кәмелетке толмаған бала анықталды. Оның заңды өкілдері полицияға шақырылды. Олар бала тәрбиесіне байланысты міндеттерін тиісінше орындамағаны үшін заң аясында қатаң жауапкершілікке тартылады»,  деп хабарлады Астана қалалық полиция департаменті.

Сонымен қатар, ведомства шабуыл жасаған жасөспірім қажетті тергеу амалдары жүргізілгеннен кейін заңнамаға сәйкес оқшауланатынын мәлімдеді.

Қазіргі таңда зардап шеккен бала ауруханаға жатқызылды, оған қажетті медициналық көмек көрсетіліп жатыр, оқиға бойынша қылмыстық іс қозғалды.