«Қызымның сүйегін өзім жинадым»: Томиристің әкесі сотта жауап берді

Әл-Фараби даңғылындағы ірі жол апатына қатысты соттың кезекті отырысында тың мәліметтер пайда болды. Осыған дейін үш марқұмның туыстарының барлығы Александр Пакты кешірген еді. Алайда бүгінгі сот процесінде марқұм Томирис Қыдырбектің  әкесі Пакты кешірмейтінін айтып өзін осы істе жәбірленуші ретінде тануды айтты, деп хабарлайды Orda.kz.

Сот процесінде Томирис Қыдырбектің әкесін (сот әкесінің аты-жөнін жазуға тыйым салды) үш қорғаушы қорғауда. Сотта олар Қыдырбектің әкесі заңға сәйкес  әкелік құқығынан айырылмағандықтан толыққанды жәбірленуші бола алатынын айтты. Судья алдымен марқұмның әкесінен куәгер ретінде жауап алынатынын айтты.

Томиристің әкесі айыпталушыны ешқашан кешірмейтінін және өтемақыдан бас тартқанын мәлімдеді. Ол БАҚ-тағы жәбірленушілер түгел кешірім берді деген ақпаратты жоққа шығарды. Сондай-ақ Таразда Александр Пактың әкесімен кездесіп, оған тек ұлын дұрыс тәрбиелемегенін ескерткенін жеткізді.

Бұрын арнайы жасақта қызмет еткен азамат мәйітханада қызының қатты зақымданған бас сүйегін өзі жинағанын еске алды. Ол жаназа қамымен жүргенде, бұрынғы әйелінің полицияға барып үлгергенін және Пактың жақындарынан қаражат алғанын айтты.

«Мен Пакты кешірмеймін Томирис менің тұңғышым еді,анасымен ажырасып кетсек те балаларымен араласып тұрдым. Томиристің жеке мектепте оқыттым, қаражатын өзім төлеп тұрдым. Қайтыс боларының алдында бір күн бұрын телефон арқылы сөйлестік. Үйге келіп наурыз көже ішетінін айтқан еді. Сол түні қызым апатқа ұшырағанда полиция маған бірінші хабарласты. Мен жаназамен айналысып жүргенде бұрынғы әйелім Пакты кешіріп тастаған екен. Мен оны ешқашан кешірмеймін. Қызымның сүйегін мәйітханадан көргенде басының бәрі мыжылып кеткен, денесінде жарақат көп болды. Осының бәрін өз көзіммен көріп отырып, мен оны қалай кешіремін», — деді әкесі.

Қазір сотта кезекті күәгерден жауап алынып жатыр. 

Оқи отырыңыз:

• Әл-Фарабидегі жол апаты: Сотта жаңа жәбірленуші пайда болды
• Вискиді даяшы ішті ме? Әл-Фараби даңғылында үш адамның өмірін жалмаған Пак прокурордың сұрағына жауап беруден бас тартты
• Әл-Фарабидегі қайғылы апат: Күдіктіні құтқармақ болғандардың өзі сотталуы мүмкін