Үкімет жасанды интеллект жүйелерінің қазақ тілінде сапалы жұмыс істеуіне күш салады

Қазақстанның Мәдениет және ақпарат министрі Аида Балаева балаларға арналған фильмдерді ел өңірлерінде кеңінен көрсету және қазақ тіліндегі цифрлық контентті дамыту бағытында бірқатар тапсырма берді, деп хабарлайды Orda.kz.        

Бұл туралы ҚР Үкіметі жанындағы мемлекеттік тіл саясатын іске асыру жөніндегі комиссия отырысында айтылды.

Жиында The Walt Disney Company, Pixar және Sony Pictures студияларының қазақ тіліне дубляждалған балалар фильмдерін еліміздің барлық өңірінде кең прокатқа шығару мәселесі көтерілді. Қазақ тіліндегі фильмдер бүкіл елге қолжетімді болуы тиіс.

Комиссия төрайымы бұл жобалардың тек Астана, Алматы және Шымкент қалаларымен шектелмей, облыс орталықтары мен ауылдық елді мекендердегі көрермендерге де қолжетімді болуын қамтамасыз етуді тапсырды.

Отырыста сондай-ақ, жасанды интеллект жүйелерінің қазақ тілінде сапалы жұмыс істеу мәселесі қаралды. Атап айтқанда, OpenAI компаниясымен бірлесіп жүзеге асырылып жатқан ChatGPT моделін қазақ тіліндегі сапалы контентпен толықтыру жобасының барысы талқыланды.

Комиссия мүшелері мемлекеттік тілдің цифрлық кеңістіктегі үлесін арттыруда бұл бағыттың стратегиялық маңызын атап өтті.

Жиында балабақша мен мектептердің тілдік дағдыларды қалыптастырудағы рөлі ерекше екені айтылды. Осыған байланысты әр жас санаты үшін лексикалық және грамматикалық минимумдарды әзірлеу, сондай-ақ оларды тиімді меңгеруге арналған заманауи цифрлық құралдарды енгізу тапсырылды.

Әсіресе жастар арасында қазақ тіліндегі цифрлық контентке сұраныс қарқынды өсіп келеді.

Аида Балаева мемлекеттік тіл саясаты талаптарының БАҚ-та сақталуын тұрақты бақылауда ұстауды тапсырды. Сонымен қатар қазақ тіліндегі контенттің сапасы мен бәсекеге қабілеттілігін арттыру, тіл нормаларын сақтау, стиль мәдениеті мен тілдік этикет талаптарына ерекше көңіл бөлу міндеттелді.

Жалпы алғанда, бұл бастамалар қазақ тілінің қолдану аясын кеңейтіп, оны кино, медиа және цифрлық технологиялар арқылы дамытуға бағытталған.

Оқи отырыңыз:

• Мемлекет басшысы Пәкістан премьер-министрін меморандумға қол қойылуымен құттықтады
• Аида Балаева: Көші-қон саясаты түбегейлі өзгереді
• Аида Балаева: Жекеменшік мектептер білім сапасын төмендетті