1,5 жылдан 23 жылға дейін: Прокурор Шерзат ісі бойынша күдіктілерге жаза сұрады

Талдықорғанда өтіп жатқан Шерзат Полаттың өліміне қатысты сот отырысы аяқталайын деді. Бүгінгі отырыста судья Ержан Жанұзақов сот тергеуінің аяқталғанын және жарыссөз кезеңінің басталғанын мәлімдеді, деп хабарлайды Orda.kz.

Жарыссөзді мемлекеттік айыптаушы Дана Сәрсенбай бастады. Ол айыпталушылардың іс-әрекеттерін толық сипаттап, сотта дәлелденген жайттарды тізіп шықты.

Прокурор жәбірленуші тараптың істі «топтасып адам өлтіру» бабына қайта саралау туралы өтінішіне қатысты да пікір білдірді.

«Қаншалықты ауыр әрі эмоциялық іс болса да, мен тек заң аясында әрекет етуге міндеттімін. Әркім тек өзі жасаған қылмысы үшін ғана жауап беруі керек. Сондықтан жәбірленушілердің басқа айыпталушыларға да «адам өлтіру» айыбын тағу туралы өтінішін қолдауға объективті негіз болған жоқ», – деді прокурор.

Сондай-ақ, Дана Сәрсенбай шындықты анықтауға кедергі келтіріп, сотты әдейі шатастыруға тырысқан адамдар бар екенін айтты. Прокурор сотқа Эльмира Нұрбекова, Дана Жақсыгелді, Юлдаш Розыбакиев және Арлан Қазакеновке қатысты сотта жауап берген сөздеріндегі қарама-қайшылықтарды тексеру үшін Алматы облысы департаментіне жеке қаулы шығаруды сұрады. Оған қоса прокурор сотталушылардың бұрын да істі болып, одан ешқандай сабақ алмағандарын да айтты.

Сөз соңында мемлекеттік айыптаушы Шерзат Полатты өлтірді деп айыпталған тұлғаларға мынадай жаза тағайындауды сұрады:

• Абзал Шынасыл – ҚР ҚК 99-бабының 2-бөлігі (кісі өлтіру), 293-баптың 3-бөлігі (бұзақылық), 24-баптың 3-бөлігі (қылмысқа дайындалу және оқталу) бойынша – 23 жыл;
• Равиль Сакиев – 99-баптың 2-бөлігі, 293-баптың 3-бөлігі, 24-баптың 3-бөлігі (кісі өлтіруге оқталу) бойынша – 20 жыл;
• Азамат Тоқтаубаев – 293-баптың 3-бөлігі (бұзақылық), 188-бап (ұрлық) бойынша – 15 жыл;
• Нұрқияс Ілиясов – 293-баптың 3-бөлігі – 9 жыл;
• Шыңғыс Белғожаев – 293-баптың 3-бөлігі – 7 жыл;
• Дархан Әскентай – 293-баптың 3-бөлігі – 7 жыл;
• Нұрбол Тоқтаубаев – 293-баптың 3-бөлігі – 7 жыл;
• Дидар Қалиахмет – 293-баптың 3-бөлігі – 7 жыл;
• Думан Ысқақ (кәмелетке толмаған) – 434-бап (ауыр қылмыс туралы хабарламау) – 1 жыл 6 ай бас бостандығынан айыру.

Orda.kz тілшілері қоғамды дүрліктірген осы сот отырысына басынан бастап қатысып келе жатыр. Алғашқы сот отырыстарында 16 жасар бозбаланың өліміне қатысты сотқа жәбірленушілер мен куәгерлер келіп, мән-жайды баяндап берген еді. 

Ал 6 мамыр күні Нұрғанатты заңсыз бейнежазбаға түсірген полицей қызметкері  Медет Әділжанов пен айыпталушы Дархан Әскентай сот алдында жауап берді. Ал 15 мамыр күні күдікті, ағайынды Тоқтаубаевтар жауап берді. 16 мамыр 9 күдіктінің бесеуі жауап берді. Олар оқиға орнына қалай барғанын және кімнің қандай әрекет жасағанын баяндады.

21 мамыр күні басты күдікті Абзал Шынасыл жауап беріп, өзінің пышақ сұқпағанын, Шерзатқа тиіспегенін айтты. Оның сөзінше, пышақты кім сұққанын көрмеген. 

Еске сала кетсек, Талғарда 4 қазан күні бір топ адам келіп дүкен иесі Қаржаубаймен, ұлы Шерзатпен және ағасы Нұрғанатпен жанжалдасып, арты кісі өліміне ұласты. 16 жасар Шерзат қаза болды. Бұл іс қоғамда үлкен резонанс тудырды.

9 желтоқсан күні таңертең жасөспірім Шерзат Полаттың ағасы Нұрғанат Ғайыпбаевтың денесі марқұм Шерзаттың зиратының қасынан табылды.

12 қазан күні Азат ауылындағы марқұм болған Шерзаттың отбасының үйі өртеніп кетті.