ЖСДП Құрылтай сайлауына 33 кандидат тізімін бекітті

08 шілде 2026 13:02 Ләззат Нұрсапақызы

Фото Informburo.kz

Жалпыұлттық социал-демократиялық партия XXV кезектен тыс съезінде сайлауалды бағдарламаны, Құрылтай сайлауына арналған кандидаттар тізімін бекітіп, жаңа электоралдық кезеңге арналған саяси стратегиясын айқындады, деп хабарлайды Orda.kz.

Іс-шараны ашқан партия төрағасы Асхат Рахымжанов Қазақстан жаңа Конституция қабылданғаннан кейін саяси дамудың жаңа кезеңіне өткенін атап өтті. Оның пікірінше, Негізгі заңда бекітілген көптеген нормаларды ЖСДП ұзақ жылдар бойы жүйелі түрде алға тартып келген.

«Көріп отырғанымыздай, біздің идеяларымыз бен тәжірибелік ұстанымдарымыз Негізгі заңда көрініс тапты. Бұл – біздің ұстанымдарымыздың дұрыстығын дәлелдейтін ең айқын айғақ. Сонымен қатар, мұны біздің табандылығымыздың, беріктігіміздің және өз ұстанымдарымызды қорғаудағы азаматтық батылдығымыздың тарихи сыйы деуге болады. Оның үстіне, мұны партиямыздың жиырма жылдық мерейтойы қарсаңында айтып отырғанымыз да мәнді», – деді ол.

Сондай-ақ партия төрағасы ЖСДП дамудың жаңа кезеңіне қадам басқанын атап өтті. Партияның сайлауалды бағдарламасы «Прогреске апарар жолдағы 20 шың» деп аталды.

Бағдарлама төрт негізгі бағытты қамтиды:

әділетті мемлекет;
адам мүддесіне қызмет ететін экономика;
лайықты өмір сапасы;
цифрлық дәуір мен жаңа жаһандық сын-қатерлер жағдайындағы Қазақстанның дамуы.

Құрылтай сайлауы 23 тамызда өтеді. 13 шілде сағат 18:00-ге дейін саяси партиялар кандидаттар тізімін ұсынады.

Құрылтай 145 депутаттан тұрады, олар бірыңғай жалпыұлттық сайлау округінің аумағында пропорционалды өкілдік жүйесі бойынша сайланады. Олардың өкілеттік мерзімі – бес жыл. Төраға лауазымына кандидатураны президент ұсынады.

Құрылтай депутаттарының сайлауына қатысуға бірнеше партия дайын екенін мәлімдеді. Кандидаттар тізімін Respublica, «Ақ жол», «Ауыл» және Қазақстанның Халық партиясы бекітіп үлгерді.

Оқи отырыңыз:

Жаңалықтар

барлық жаңалықтар