«Ақ жол» партиясы Құрылтайға 63 кандидат ұсынды

Қазақстанның «Ақ жол» демократиялық партиясы жексенбі күні өткен кезектен тыс съезінде Құрылтайға ұсынылатын кандидаттар тізімін бекітті. Тізімге 63 адам енді, деп хабарлайды Orda.kz.        

Олардың қатарында партияның бұрынғы төрағасы Азат Перуашев пен қазіргі төрағасы Дания Еспаева бар.

Партиялық тізімге еліміздің барлық өңірлерінен, кәсіпкерлік саладан, сарапшылар қауымдастығынан және түрлі қоғамдық қызмет өкілдері енгізілген.

Олардың ішінде VII және VIII шақырылым Қазақстан Республикасы Парламенті Мәжілісі депутаттары — Дания Еспаева, Азат Перуашев, Ерлан Барлыбаев, Қазыбек Иса, Берік Дүйсембинов, Серік Ерубаев, Олжас Нұралдинов, Ерлік Өмірғали бар.

Сонымен қатар тізімге Қарағанды облыстық мәслихатының депутаты Ермек Әбілдин, Петропавл қалалық мәслихатының депутаты Ләззат Жалмұқанова, Семей қалалық мәслихатының депутаты Анатолий Калинкин, Солтүстік Қазақстан облыстық мәслихатының VIII шақырылым депутаты Евгений Кинцель, Алматы велоспорт федерациясының президенті Андрей Линник, адвокат Сергей Уткин және басқа да тұлғалар енген.

Съезд барысында партияның «Сөзсіз өзгеріс» атты сайлауалды бағдарламасы таныстырылды. Партия төрағасы Дания Еспаева атап өткендей, «қазіргі таңда елге тек саяси өзгерістер ғана емес, сонымен қатар тұрақты экономикалық өсімді қамтамасыз ететін, әділ бәсеке қалыптастыратын, тиімді мемлекеттік басқаруды және азаматтардың лайықты өмір сүру деңгейін қамтамасыз ететін нақты шешімдер қажет».

Оның айтуынша, бағдарлама партияның көпжылдық бастамаларын біріктіріп, елдің әрі қарай дамуына кешенді көзқарас ұсынады. Онда тәуелсіздік пен ұлттық мүддені қорғаудан бастап, парламентаризмді нығайту, кәсіпкерлікті қолдау, сыбайлас жемқорлықпен күрес, адами капиталды дамыту, заманауи технологиялар мен еркін нарықтық экономиканы дамыту мәселелері қамтылған.

Оқи отырыңыз:

• «Ақ жол» партиясының төрағасы Азат Перуашев қызметінен кетті
• 10 мыңнан астам сайлау учаскесі: ОСК Құрылтай сайлауына жеті партияны жіберді