Respublica партиясы Құрылтай тізіміне 76 адамын бекітті

Respublica партиясы сенбі күні алғашқылардың бірі болып съезд өткізіп, Құрылтай депутаттығына кандидаттардың партиялық тізімін бекітті. Тізімге барлығы 76 адам енді, деп хабарлайды Orda.kz.       

Кезектен тыс V съезд барысында партияның орталық аппараты басшысы Жанат Ысқақов мәлім еткендей, кандидаттардың орташа жасы — 41 жас. Тізімде 44 ер адам және 32 әйел бар. 35 жасқа дейінгі жастардың үлесі 11 адамды немесе 14,5%-ды құрайды. Ең жас кандидат — 27 жаста, ал ең жасы үлкені — 55 жаста.

Оның айтуынша, партиялық тізімнің негізгі бөлігін кәсіпкерлер құрайды — 68%. Мемлекеттік және квазимемлекеттік сектор өкілдері шамамен 10,6%, ғылым және білім саласы — 1,3%, агроөнеркәсіп кешені — 1,2%, ал мәдениет, спорт, медиа және үкіметтік емес ұйымдар өкілдері — 18,5%.

Тізімде еліміздің барлық 17 облысынан, сондай-ақ республикалық маңызы бар үш қаладан және астанадан кандидаттар ұсынылған.

Құрамына VIII шақырылым Қазақстан Республикасы Парламенті Мәжілісінің бес депутаты және түрлі деңгейдегі мәслихаттардың жеті депутаты енген. Жалпы тізімнің шамамен 70%-ы — жаңа тұлғалар, ал бұрын сайлауға қатысқан кандидаттар үлесі — шамамен 30%.

Атап айтқанда, партиялық тізімге тең төраға Бейбіт Әлібеков, VIII шақырылым Мәжіліс депутаттары Айдарбек Қожаназаров, Нұргүл Тау, Екатерина Смолякова, Динара Наумова, Олжас Күсбеков, сондай-ақ партияның орталық аппаратының төрағасы Жанат Ысқақов, президент телерадиокешені директорының кеңесшісі Ерболат Мұхамеджан және басқа да тұлғалар кірді.

Оқи отырыңыз:

• Қазақстанда жаңа партия құрылады
• Amanat өкілдері Adilet-ке қосылатынын ресми жариялады
• Астанада «Әділет» партиясының құрылтай съезі өтті