«Ауыл» партиясы Құрылтай сайлауына 69 кандидат ұсынады

«Ауыл» партиясы кезектен тыс XXVI съезі барысында сайлауалды бағдарламасын және Құрылтай депутаттығына кандидаттар тізімін бекітті, деп хабарлайды Orda.kz.       

Іс-шараға елдің барлық өңірінен 200 адам қатысты. Делегаттардың 30,4%-ы ауыл шаруашылығы саласының өкілдері.

Партиялық тізімге Құрылтай депутаттығына 69 адам енді. Олардың 71%-ы – ерлер, 29%-ы – әйелдер. Кандидаттардың басым бөлігі — 56,5%-ы — 35 пен 55 жас аралығындағы азаматтар.

«Ауыл» партиясынан кандидат болу — үлкен мәртебе ғана емес, сонымен қатар зор жауапкершілік. Бұл — біздің бағдарламаны лайықты таныстыру, халықпен ашық диалог жүргізу және партия мен сайлаушылар артқан сенімді ақтау міндеті», — деп атап өтті партия төрағасы Қайрат Айтуғанов. 

Еске салсақ, Құрылтай сайлауы 23 тамызда өтеді. 13 шілде сағат 18:00-ге дейін саяси партиялар кандидаттар тізімін ұсынады.

Қазақстанда Құрылтай екі палаталы парламенттің орнына келеді. Ол біртұтас жалпыұлттық сайлау округі аумағында пропорционалды өкілдік жүйесі бойынша сайланатын 145 депутаттан тұрады. Депутаттардың өкілеттік мерзімі — бес жыл. Төраға лауазымына кандидатураны президент ұсынады.

Бұған дейін бірнеше партия Құрылтай депутаттары сайлауына қатысуға дайын екенін мәлімдеген. Кандидаттар тізімін Respublica партиясы мен  «Ақ жол» партиясы да бекітті.

Жақында Орталық сайлау комиссиясы Құрылтай депутаттарын сайлауға қатысатын саяси партиялардың тізімін бекітті. 

Дауыс беру 2026 жылғы 23 тамызда өтеді.  Сайлауға қатысуға келесі жеті саяси партия жіберілді:

«Ақ жол» демократиялық партиясы;
Respublica партиясы;
«Байтақ» жасылдар партиясы;
«Ауыл» партиясы;
«Әділет» партиясы;
Жалпыұлттық социал-демократиялық партия;
Қазақстанның халық партиясы.

Оқи отырыңыз:

• Құрылтай — жаңа формат: Президент Құрылтай сайлауы мен оның маңызына тоқталды
• Respublica партиясы Құрылтай тізіміне 76 адамын бекітті
• «Ақ жол» партиясы Құрылтайға 63 кандидат ұсынды