«Жемқорлық»: Алматыда түрме бастығы ұсталды

Алматының Түрксіб ауданындағы колонияны басқарған бұрынғы шенеунікке қатысты тергеу жүріп жатыр. Оның ұсталғаны туралы ақпаратты ҚР Ішкі істер министрлігі Қылмыстық-атқару жүйесі комитеті «Орда» редакциясына растады.

Бейресми деректерге сүйенсек, күдікке әділет полковнигі Бекзат Әкімбай ілінген. Ол минималды қауіпсіздік деңгейіндегі №13 мекемесінің басшысы болған. Белгілі болғандай, оны қызметтік кабинетінде қолға түсірген.

ҚАЖК редакцияға берген жауабында Әкімбайдың ұсталмас бұрын ішкі істер органдарында жұмыс істемегенін мәлімдеді.

«Қазір құзырлы органдар сотқа дейінгі тергеу жүргізіп жатыр», – деп хабарлады комитет өкілдері.

Қылмыстық істің мән-жайы әзірге жарияланған жоқ.

Айта кетейік, шамамен бір ай бұрын Жамбыл облысында полиция бастығы қылмыстық істі жасырғаны үшін қамауға алынған болатын.