Жер телімін алып беремін деп 33 адамды алдаған маман сотталды

Алматы облысында өзін жер кадастры саласының маманы ретінде таныстырып, азаматтарды алдаған күдіктіге қатысты сот үкімі шықты. Іс Жамбыл аудандық сотында қаралып, айыпталушы алаяқтық жасағаны үшін кінәлі деп танылды, деп хабарлайды Orda.kz.       

Сот материалдарына сәйкес, 2024–2025 жылдар аралығында айыпталушы «Азаматтарға арналған үкімет» мемлекеттік корпорациясының аудандық тіркеу және жер кадастры бөлімінде қызмет атқарған. Қызметтік мүмкіндігін пайдаланып, ол тұрғындарға жер телімдерін арзан бағаға алып беретінін және тұрғын үй құжаттарын заңдастырып беруге көмектесетінін айтып, жалған уәде берген.

Қазақстан Республикасы Қылмыстық кодексінің 190-бабы 3-бөлігіне сәйкес, мұндай қылмыс үшін 3 жылдан 7 жылға дейін бас бостандығынан айыру жазасы қарастырылған.

Сот жаза тағайындау кезінде бірқатар жеңілдететін мән-жайларды ескерді. Атап айтқанда, сотталушының шын жүректен өкінуі, келтірілген шығынның басым бөлігін өз еркімен өтеуі және жәбірленушілердің оны кешіруі назарға алынды.

Нәтижесінде сот үкімімен айыпталушы 3 жыл мерзімге бас бостандығынан айырылды. Сонымен қатар, ол өмір бойына мемлекеттік қызметте, қаржы ұйымдарында және квазимемлекеттік секторда лауазымды қызмет атқару құқығынан айырылды.

Сондай-ақ сот жәбірленушілердің азаматтық талаптарын толық көлемде қанағаттандырды.

Айта кетейік, үкім заңды күшіне енді.

Бұл іс азаматтарға мемлекеттік қызметкерлер атын жамылып жасалатын алаяқтықтан сақ болу қажеттігін тағы бір мәрте еске салады. Мамандар кез келген күмәнді ұсыныстарға сенбей, ресми органдар арқылы ғана қызмет алуға кеңес береді.

Оқи отырыңыз:

• Қазақстандықтар енді БАӘ-де жүргізуші куәлігін оңай айырбастай алады
• Астанада Ұлттық ұлан сарбазы Ербаян Мұхтардың денесі жер қойнына тапсырылды
• Шымкентте ірі өрт: ТЖМ құтқарушылары тілсіз жауды ауыздықтады