Ұлттық футбол құрамасы Талғат Байсуфиновтың орнына жаңа бас бапкер іздеп жатыр

Қазақстан футбол федерациясының президенті Марат Омаров Талғат Байсуфинов қызметінен кеткеннен кейін ұлттық құрамаға жаңа бас бапкер іздеп жатқаны туралы айтты, деп хабарлайды Orda.kz.       

Үкіметтің бірлескен отырысы аясында сөйлеген Марат Омаров Қазақстан ұлттық құрамасының бас бапкері қызметіне үміткерлерді іріктеу барысы жөнінде айтып өтті.

ҚФФ президентінің айтуынша, қазіргі таңда жаттықтырушылар кеңесі отандық мамандарды да, шетелдік мамандарды да қарастырып жатыр.

«Қазір ең бастысы — дұрыс бас бапкер табу. Жаттықтырушылар кеңесі үміткерлерді жергілікті мамандар арасынан да, шетелдік мамандар арасынан да қарап жатыр. Біз өзімізге ең лайықты маманды таңдаймыз», — деді Марат Омаров. 

Сондай-ақ ол ұлттық құраманың бұрынғы бас бапкері Талғат Байсуфиновтың қызметінен кетуіне қатысты пікір білдірді. ҚФФ президенті оның өз еркімен кеткенін растап, бапкердің жүйеде қала беретіні үшін алғыс білдірді.

«Бас бапкердің отставкасы — оның өз шешімі, өз бастамасы. Біз оны құрметпен қабылдадық. Өкінішке қарай, осындай шешім қабылданды, бірақ біз әрі қарай дамып, алға жылжи береміз. Оның жүйеде қалғанына өте ризамыз», — деп толықтырды Омаров. 

Еске сала кетейік, бұған дейін, 22 маусым күні, Қазақстан ұлттық құрамасының  бас бапкері Талғат Байсуфинов өз қызметінен кету туралы шешім қабылдаған еді. 

ҚФФ баспасөз қызметі оның отставкаға өтініш беріп, федерация оны қабылдағанын мәлімдеді. Талғат Байсуфинов ұлттық құраманы 2025 жылдың қазан айынан бастап жаттықтырды. Оның жетекшілігімен команда 2026 жылғы әлем чемпионатының іріктеу кезеңінде үш матч өткізіп, бірде-бір рет жеңілген жоқ.

Оқи отырыңыз:

• ӘЧ-2026: Түркия АҚШ-ты жеңді, бірақ плей-оффқа шыға алмайды
• Қазақстан ұлттық құрамасының бас бапкері Талғат Байсуфинов қызметінен кетті
• Футболдағы дау: Футболшы мен төреші матчтардан шеттетіліп, клубқа 400 АЕК айыппұл салынды