ҚР СІМ: Қазақстандықтарға шенген визасын алу жеңілдейді

Қазақстан азаматтары үшін шенген визасын алу тәртібі жеңілдетілуі мүмкін. Атап айтқанда, өтініштерді қарау мерзімін қысқарту, құжаттарға қойылатын талаптарды жеңілдету және көп мәртелік визаларды алу мүмкіндігін кеңейту жоспарланып отыр, деп хабарлайды Orda.kz.        

Бұл туралы Қазақстан Республикасы Сыртқы істер министрлігінің ресми өкілі Ерлан Жетібаев мәлімдеді.

Жетібаевтың айтуынша, 23 маусым күні президент Қасым-Жомарт Тоқаевтың Брюссельге сапары аясында Еуропалық кеңес президенті Антониу Кошта және Еуропалық комиссия президенті Урсула фон дер Ляйенмен кездесулер өткен.

«Қол жеткізілген уағдаластықтар Қазақстан азаматтары үшін визалық рәсімдерді одан әрі жеңілдетуді көздейді. Оның ішінде визалық өтініштерді қарау мерзімін қысқарту, көп мәртелік визалар алу мүмкіндігін кеңейту, растайтын құжаттарға қойылатын талаптарды жеңілдету және басқа да шаралар бар», — деді Ерлан Жетібаев. 

Оның сөзінше, келіссөздер процесінің аяқталуы Қазақстан мен Еуропалық одақ ынтымақтастығының маңызды практикалық нәтижесі болды.

СІМ өкілі сарапшылар деңгейіндегі келіссөздер толық аяқталғанын нақтылады. Қарастырылып жатқан шаралардың қатарында құжаттар тізімін қысқарту, консулдық алымды азайту, көп мәртелік визаларды беру тәжірибесін кеңейту және өтініштерді қарау мерзімін қысқарту бар.

«Толық ақпарат тиісті келісімдерге қол қойылғаннан кейін жарияланады. Қазір тараптар құжаттарды қол қоюға дайындау бойынша ішкі мемлекеттік рәсімдер кезеңіне өтті», — деп қосты ол. 

Жетібаевтың айтуынша, Қазақстан өз ішінде қажетті рәсімдерді жүргізіп жатыр, ал еуропалық тарап құжаттарды Шенген аймағына кіретін барлық мемлекеттермен келісуі тиіс. Сондықтан бұл процесс белгілі бір уақытты қажет етеді, ал нақты қол қою күні әзірге белгісіз.

Айта кетейік, бұған дейін СІМ шенген визалары толықтай жойылмайтынын, тек оларды алу рәсімі жеңілдетілетінін мәлімдеген болатын. Атап айтқанда, құжаттардың нақты тізімі, рәсімдеу құны және көп мәртелік визаларды беру мүмкіндіктері талқыланған.

Сондай-ақ өткен жылы СІМ келісімде өтініштерді қарау мерзімін қысқарту, қажетті құжаттар санын азайту, визалық алымдарды төмендету және ұзақ мерзімді көп мәртелік визалар беру мүмкіндігін кеңейту қарастырылуы мүмкін екенін хабарлаған еді.

2026 жылдың қаңтарында Сыртқы істер министрінің орынбасары Әлібек Бақаев Қазақстанның Еуроодақпен жұмысы екі бағытқа бөлінгенін айтқан, оның ішінде  реадмиссия туралы келісім және визалық режимді жеңілдету туралы келісім. 

Оқи отырыңыз:

• Қазақстан Еуропалық Одақпен визалық режимді жеңілдетпекші
• ҚР СІМ: Қазақстан босқындардың жаппай ағылуына жол бермейді
• Қазақстан мен Еуропалық одақ 12 миллиард долларлық келісім дайындап жатыр