Қазақстан Иран портында жерді жалға алып, мұхитқа шығуды жоспарлап отыр

Қазақстан Ирандағы Бендер-Аббас портында жүк ауыстырып тиеуге арналған терминал салуды жоспарлап отыр. Бұл туралы вице-премьер Серік Жұманғарин мәлімдеді, деп хабарлайды Orda.kz.

Ел 15 гектар жерді жалға алмақ. Жұманғариннің айтуынша, құрылыс бюджет қаражаты есебінен жүргізілмейді — жобаны жеке инвестициялар арқылы жүзеге асыру көзделген. Оның мәліметінше, келісім соңғы кезеңге жеткен, ал жалға алу шарттары келісілген.

Вице-премьер Бендер-Аббас порты Қазақстанға Парсы шығанағына тікелей шығуға, әрі қарай Үндістанға, Шығыс Африкаға, Парсы шығанағы елдеріне және Оңтүстік-Шығыс Азияға жол ашатынын атап өтті.

«Бұл — Қазақстанның мұхитқа тікелей шығуы. Үндістан, Шығыс Африка, Парсы шығанағы елдері және Оңтүстік-Шығыс Азия. Мақсат осы, бұдан басқа мақсат жоқ», — деді ол. 

Жұманғариннің сөзінше, Иран арқылы өтетін бағыт қазірдің өзінде бар. Ақтаудан жүк Түрікменстан арқылы тасымалданып, Этрек немесе Серахс шекара бекеттері арқылы өтіп, Парсы шығанағына шығады.

Ол Қазақстан бұл бағытты тек мұнай немесе ауыл шаруашылығы өнімдері үшін ғана емес, түрлі тауарларды тасымалдау үшін пайдалануға ниетті екенін айтты. Алайда қазіргі таңда Иран арқылы өтетін кейбір жеткізілімдер мен транзит санкцияларға байланысты шектелген.

Егер Иран бағыты жүзеге аспай қалса, Қазақстан балама нұсқа ретінде Ауғанстан арқылы өтіп, Пәкістанның терең су порттарына шығатын жол салуды да қарастырып отыр.

Бұған дейін Қазақстанның әлемнiң аса маңызды теңiз бағыттарының бiрi — Ормуз бұғазы маңындағы Иран портында өз учаскесi болатынын жазғанбыз. Дәл осы тар дәліз арқылы әлемдік мұнайдың едәуір бөлігі өтеді. 

Қажетті рәсімдер аяқталғаннан кейін учаске Қазақстан жағына беріледі. Бұған жауап ретінде Қазақстан Иранға Ақтау және Құрық порттарындағы алаңдарын, айлақтар мен терминалдарды Каспийдегі ирандық компаниялардың логистикалық қызметін дамыту үшін беру мүмкіндігін қарастыруға дайын екенін растады.

Оқи отырыңыз:

• Ормуз бұғазы маңындағы Иран портында Қазақстанның өз алаңы болады
• Иран мұнайы қайтадан әлемдік нарыққа шығарыла бастады
• Қазақстан Ауғанстанға бидайдан бастап жасанды интеллектке дейін апарды